Быыһааччылар ыалдьыбыт булчукка көмөлөстүлэр

Өрөспүүбүлүкэ быыһыыр сулууспатын быыһааччылара Сунтаар улууһун Күүкэйиттэн 100 км ыраах сылдьан ыалдьыбыт булчукка көмөлөстүлэр. 

Бу туһунан СӨ Быыһыыр сулууспата иһитиннэрдэ. Ол курдук булчут ыалдьыбытын, сатаан снегоходунан кэлэр кыаҕа суоҕун туһунан  бииргэ сылдьыбыт киһитэ Күүкэйгэ  кэлэн тыллаабыт.

«Тута быыһааччылар биэлсэри илдьэ снегоходунан булчукка айаннаабыттар.  Онно тиийэн көрбүттэрэ, барыллааһын быһыытынан  булчут икки өттүнэн сэбиргэхтэппитэ быһаарыллыбыт», — диэн СӨ Быыһыыр сулууспатын быыһааччыта  Марк Потапов кэпсээтэ.

Ыалдьыбыт киһини эвакуациялыырга  санитарнай авиация бөртөлүөтэ кэлбит. Онон, сэтинньи 16 күнүгэр эр киһини Сунтаардааҕы киин балыыһаҕа аҕалбыттар.