Быыһаачылар өрүскэ тимирбит тыраахтар дьонун көрдүүллэр

СӨ Быыһыыр сулууспатын быыһааччылара уонна водолазтара Өлүөнэ өрүскэ ахсынньы 12 күнүгэр тимирбит «Беларус» тыраахтар дьонун көрдүүллэр.

Тыраахтар тимирбит сириттэн уу сүүрүгүнэн үс хайысханан ойбоннору хаспыттара. 5-6 миэтэрэ дириҥҥэ камералары ыытан көрдүүллэр.

«Ааспыт сууккаҕа 17 тыһыынча кв.м. иэннээх сири көрдүбүт. Билиҥҥитэ туох да көстө илик», — диэн СӨ Быыһыыр сулууспатын  аэромобильнай көрдүүр-быыһыыр подразделениетын 2-с кылаастаах быыһааччыта Максим Колесов иһитиннэрэр.

Көрдүүр үлэҕэ тоҕус быыһааччы уонна водолаз, 46 олохтоох киһи сылдьар.

Санатан суруйдахха, ахсынньы 12 күнүгэр Өлүөнэ өрүскэ Дьокуускай уонна Төхтүр сэлиэнньэтин икки ардыгар икки киһилээх  «Беларус» тыраахтар тимирбитэ. Водолазтар 6 миэтэрэ дириҥтэн тыраахтары булбуттара, дьонун була иликтэр.