Быыһыыр сулууспа сүппүт дьону көрдүүр

Быыһыыр сулууспаҕа күһүҥҥү түбүгэ үгүс. Ол курдук, Өлүөхүмэ оройуонугар Чаара өрүскэ балаҕан ыйын 19 күнүгэр сүппүт үс киһини көрдүүллэр.

Онон. Чаара өрүс түгэҕин чинчийдилэр. Көрдүүр үлэҕэ мотуордаах икки оҥочонон сырыттылар, олохтоохтортон баҕа өттүлэринэн 6 киһи уонна Саха сирин Быыһыыр сулууспатын 3 үлэһитэ кытыннылар. Бэҕэһээ ууга түспүт дьонтон биирдэрин саппыкытын  булбуттар.

Ону тэҥэ Ленскэй оройуонугар 1963 с. төрүөх эр киһини көрдөөһүн салҕанар. Бу киһи сүппүтүн туһунан балаҕан ыйын 21 күнүгэр тыллаабыттар. Ол кэнниттэн балаҕан ыйын 25 күнүгэр Өлүөнэ сүнньүнэн Джерба өрүскэ 9 миэтэрэ дириҥнээх сиргэ тиэрэ эргийэн сытар оҥочо көстүбүт. Видеокамеранан аймахтара ол оҥочону  бигэргэппиттэр. Сарсыныгар кытылы чинчийбиттэр, биэрэктэн фарватерга диэри 350-400 миэтэрэ сиргэ квадрокоптеры туһаммыттар. 9 быыһааччы 4 оҥочонон сырыттылар.

Оттон Томпо оройуонугар балаҕан ыйын 18 күнүгэр сүппүт 1972 с. төрүөх эр киһини икки водолаз  көрдүүр.

Ону тэҥэ Өймөкөөн оройуонун Уус Ньара бөһүөлэгэр 2018 с. төрүөх оҕону көрдөөһүн сөргүтүлүннэ. Бу уолчаан Индигиир эбэҕэ атырдьах ыйын 5 күнүгэр сүппүтэ биллибитэ. Быыһааччылар бөлөхтөрө балаҕан ыйын 26 күнүттэн үлэлиир.