Сүппүт дьону көрдүүллэр, ыалдьыбыт киһиэхэ көмөлөстүлэр…

Мэҥэ Хаҥалас улууһугар 1965 с.т. сүппүт сылгыһыты көрдөөһүн салҕанар. Эр киһи муус устар 26 күнүгэр сылгы баазатыгар барбыт уонна онтон ыла биллибэтэх.

Ыам ыйын 10 күнүгэр Валерий Андросов салалтатынан Быыһааччылар бөлөхтөрө бу киһини көрдүү тиийбит. Ыам ыйын 21-22 күннэригэр Хара чох диэн учаастактан Көрдүгэҥҥэ диэри көрдөөбүттэр. Сүппүт киһини аҕыс киһи көрдүүр, итинтэн алтата быыһааччылар. Пилота суох көтөр аппараатынан (БПЛА) Таҥхаттан Үөттээх үрэх сүнньүгэр диэри көрдөнбүттэр. Ыам ыйын 22 күнүгэр бөлөх салайааччыта Валерий Андросов салалтатынан быыһааччылар оҥочонон 12 км сиринэн сылдьыбыттар.

Үөһээ Бүлүү улууһугар ЕДДС ыам ыйын 13 күнүгэр 00.05 ч. Кэнтиктэн 20 км тэйиччи Түбэ диэн сиргэ 1987 с.т. эр киһи сүппүтүн туһунан иһитиннэрбиттэр. Кини доҕотторун кытта бултуу тахсыбыт.

Ыам ыйын 21 күнүгэр Бүлүү өрүһүнэн 40 кв. км уу ылар сиринэн көрдөөбүттэр. Үс бөлөххө арахсыбыттар, биэс киһилээх 1 бөлөх ууга барбыт учаастак кытыытынан сылдьыбыттар. Биэс киһилээх иккис бөлөх Бүлүү өрүһүнэн аллараа көрдөөбүт. Аҕыс киһилээх үһүс бөлөх Көппөхтөөхтөн Туора диэн сиргэ диэри көрдөөбүттэр. Барыта 18 км сири хаппыттар. Пилота суох көтөр аппараатынан 6 кв. км көрбүттэр. Туох да түмүк суох, көрдөөһүн салҕанар.

Өлүөхүмэ оройуонугар ыам ыйын 6 күнүгэр 15:50 ч. ЕДДС Сайылык диэн сиргэ 1960 с.т. киһи сүппүтүн туһунан иһитиннэрии киирбит. Икки киһи ойуурга барбыт. Кинилэртэн биирдэстэрэ наадалаах буолан Өлүөхүмэҕэ киирбит. Төннөн тиийиитигэр анараа киһитэ суох буолан биэрбит. Быһахтаах, төлөпүөннээх хайа диэки барбыта биллибэт эбит. Бастаан бэйэлэрин күүстэринэн көрдөөбүттэр. Ыам ыйын 19 күнүгэр Быыһааччылар сулууспаларын көрдүүр-быыһыыр этэрээтин быыһаччылара көмөҕө тиийбиттэр.

Үөһээ Бүлүү улууһугар ыам ыйын 19 күнүгэр 21:45 ч. эл.почтанан ЕДДС Маай учаастагар ыам ыйын 7 күнүгэр 1957 с.т. киһи сүппүтүн туһунан иһитиннэрии кэлбит. Ыам ыйын 21 күнүгэр көрдөөһүҥҥэ, Түүкээн үрэхтэн быһа холуйан 9 км тэйиччи булт саатын, килиэп уонна кутаа оттуллубут сирин булбуттар, кутаа быһа холуйан ыам ыйын 8 эбэтэр 9 күнүгэр оттуллубут буолуон сөп диэн быһаарбыттар. Суолуттан-ииһиттнэн көрдөххө муммут буолуон сөп диэбиттэр. Ыам ыйын 22 күнүгэр ИДьМ икки киһи уонна олохтоох нэһилиэнньэттэн эмиэ икки киһи эбии көмөҕө кэлбиттэр. 13:48 ч. солооһуҥҥа хоммут сирин булбуттар, бөлөх бу суолунан көрдүүр.

Намҥа Хардаҥҥа көрдүүр-быыһыыр этэрээт үлэһиттэрэ сылгы баазатыттан ыалдьыбыт киһини аҕалбыттар.

Муниципальнай таһымнаах ыксаллаах быһыы-майгы биллэриллибит Орто Халыма оройуонугар СӨ Быыһыыр сулууспата нэһилиэнньэҕэ куттал суох буолуутун хааччыйыыга көмөлөһөр.

СӨ Быыһыыр сулууспата