Быыстапкаҕа 160 тыһыынчаттан тахса киһи сырытта

«Арассыыйа» быыстапкаҕа дьон-сэргэ Саха сирин култууратын уонна ситиһиитин туһунан сиһилии билэн-көрөн баран санааларын үллэһиннилэр.

Быыстапкаҕа Саха сирин сырдатар экспозицияҕа тоҕус күн устатыгар 160 тыһыынчаттан тахса киһи сырытта. Тэрийээччилэр бэлиэтииллэринэн, өрөбүлгэ тэрээһиннэргэ 45 000 кэриҥэ киһи сылдьыбыт.

«Азия оҕолоро» спортивнай оонньуулар, «Метаморфозы эпоса Олонхо» тетарализованнай көрдөрүү уонна «Уруу алгыһа», норуот уус-уран оҥоһуктарын быыстапка-дьаарбаҥката, киэҥ култуурунай бырагыраама, уо.д.а. көрөөччүлэр болҕомтолорун тардаллар.

«Манна наһаа интэриэһинэй, сонун элбэх. Билиини-көрүүнү тургутар викториналар, олус үчүгэй экскурсия, барытын сөбүлээтибит. Элбэҕи биллим. Мин Саха сиригэр наһаа тымныы уонна табалар сүүрэ сылдьаллар диэн саныыр этим. Оттон билигин, аны, Саха сиригэр барыахпын баҕардым. Сиэним сэҥээрэн, сэргээн көрүөн, кэрэхсиэн баҕарабын«, — диир быыстапканы көрбүт ыалдьыттартан биирдэстэрэ.

«Бу эрэгийиэн атыттартан ураты. Аан дойдуга ханна да суох кэрэ сирдэрдээх. Холобур, чысхаан тымныытынан биллэр Өймөкөөн«, — диир иккис киһи.

Ити курдук, уратытын, сөхтөрөрө элбэҕин бэлиэтээтилэр. Элбэх киһи Саха сиригэр туристыы кэлиэн баҕарарын биллэрдэ.

«Олус үчүгэй тэрээһин. Болҕомтону тардар. Саха сиригэр бара сылдьыахпын баҕардым. Өрөспүүбүлүкэ ситиһиилэрин туһунан истэр олус интэриэһинэй. Маннык быыстапка биһиги  дойдубут туһунан билэрбитигэр-көрөрбүтүгэр сирдиир, инникигэ бигэ эрэли саҕар«, — диэн Москва олохтоохторо бэлиэтииллэр.

Санатан эттэххэ, «Арассыыйа» норуоттар икки ардыларынааҕы быыстапка-пуорум  Москваҕа ВДНХ сиригэр-уотугар сэтинньи 4 күнүттэн саҕаламмыта уонна кэлэр сыл муус устар 12  күнүгэр диэри салҕаныаҕа.

Сиһилии https://www.sakha.gov.ru/news/front/view/id/3377185 манна ааҕыҥ.