Cаамай маассабай күрэхтэһии түмүктэрэ

Cаамай маассабай күрэхтэһии түмүктэрэ

16.06.2024, 14:00
Хаартыска: Мария Васильева, СИА
Бөлөххө киир:

Бу күннэргэ буолбут өрөспүүбүлүкэ үөрэнээччилэрин саамай маассабай күрэхтэһиитэ — “Спортивные якутяне” спартакиада бүттэ.

Бырабыыталыстыба бэрэссэдээтэлин солбуйааччы Сергей Местников спартакиада былырыын Ил Дархан Айсен Николаев этиитинэн сөргүтүллүбүтүн санатта.

“Былырыыҥҥы спартакиадаттан уратыта диэн, бастакытынан, күрэхтэһээччи ахсаана эбилиннэ. Былырыын өскөтүн үс түһүмэх түмүгүнэн Саха сирин үрдүнэн барыта 63 тыһ. оҕо кыттыбыт эбит буоллаҕына, быйыл 69 тыһ. тахса оҕо кытынна. Ол аата, спартакиада кэҥээн, успуордунан утумнаахтык дьарыктанар оҕо ахсаана эбиллэн иһэр. Ити олус үчүгэй көрдөрүү. Инникитин ити көрдөрүү тупса, оҕо ахсаана эбиллэ туруо диэн бигэ эрэллээхпит.

Иккиһинэн, Ил Дархан Айсен Николаев бэйэтин көҕүлээһининэн киллэрбит анал бириэмийэтэ олохтоммута. Иитиллээччилэрэ үрдүк көрдөрүүлээх, кыайбыт-хоппут оҕолордоох 31 тириэньэргэ сыллата 100‑түү тыһ. солк. суумалаах бириэмийэ туттарыллыаҕа”, — диэн эттэ.

Бастыҥ тириэньэрдэргэ уонна учууталларга — 100 тыһ. солк.

Эрдэ биллэрбиттэрин курдук, спартакиада сабыллыытыгар, көрүҥнэринэн бастыҥ тириэньэрдэргэ уонна физкултуура учууталларыгар үөрүүлээх быһыыга-майгыга 100 тыһ. солк. суумалаах сэртипикээттэри туттардылар.

1. Бадминтоҥҥа — Надежда Батьянова (Дьааҥы улууһа),

2. Баскетболга уолаттарга — Степан Григоращук (Нерюнгри улууһа),

3. Баскетболга кыргыттарга — Руслан Проскуренко (Нерюнгри улууһа),

4. Греко-римскай тустууга — Матвей Матвеев (Дьокуускай),

5. Дзюдоҕа — Дмитрий Поварич (Дьокуускай),

6. Кибер-успуорка — Владимир Семенов (Нам улууһа),

7. Кикбоксиҥҥа — Дмитрий Черноградскай (Нам улууһа),

8. Хайыһарга — Петр Тайшин (Алдан улууһа),

9. Мини-футболга — Прокопий Федоров (Дьокуускай),

10. ГТО многоборьетыгар — Семен Килбясов (Амма улууһа),

11. Остуол оонньууларыгар (хабылык, хаамыска) — Надежда Белолюбская (Дьокуускай),

12. Остуол тенниһигэр — Василий Румянцев (Дьокуускай),

13. Буулдьанан ытыыга — Александр Николаев (Сунтаар улууһа),

14. Самбоҕа — Толибшо Ерамейнов (Алдан улууһа),

15. Хотугу многоборьеҕа — Раиса Григорьева (Дьааҥы улууһа),

16. Спортивнай ориентированиеҕа — Оксана Назарова (Дьокуускай),

17. Оскуола спортивнай кулууптарын успуорка оонньууларыгар — Татьяна Крылова (Дьокуускай),

18. Түөрүйэ куонкуруһугар — Сардана Колосова (Нам улууһа),

19. Хапсаҕайга — Михаил Егоров (Үөһээ Бүлүү улууһа),

20. Сахалыы ыстаныыларга — Тимофей Слепцов (Дьокуускай),

21. Чэпчэки атлетикаҕа (доруобуйаларынан хааччахтаах оҕолорго) — Василий Оленов (Дьокуускай),

22. Буоксаҕа — Анатолий Пилевин (Нерюнгри улууһа),

23. Волейболга уолаттарга — Айсен Жерготов (Нам улууһа),

24. Волейболга кыргыттарга — Саргылаана Оконешникова (Чурапчы улууһа),

25. Көҥүл тустууга — Николай Яковлев (Дьокуускай),

26. Гиирэ успуордугар — Иннокентий Бояров (Таатта улууһа),

27. Чэпчэки атлетикаҕа — Петр Нечаев (Дьокуускай),

28. Мас тардыһыытыгар — Дмитрий Устинов (Мэҥэ Хаҥалас),

29. Оҕунан ытыыга — Павел Алексеев‑Стасов (Хаҥалас улууһа),

30. Саахымакка — Роман Ганжуров (Дьокуускай),

31. Дуобакка — Иван Павлов (Дьокуускай).

Уопсай түмүккэ хамаанданан кыайыылаахтар

I бөлөххө:

1 м. — Дьокуускай куорат,

2 м. — Нам улууһа,

3 м. — Мэҥэ Хаҥалас улууһа.

II бөлөххө:

1 м. — Чурапчы улууһа,

2 м. — Үөһээ Бүлүү улууһа,

3 м. — Таатта улууһа.

III бөлөххө:

1 м. — Кэбээйи улууһа,

2 м. — Өймөкөөн улууһа,

3 м. — Булуҥ улууһа.

IV бөлөххө:

1 м. — Өлөөн эбэҥки национальнай улууһа,

2 м. — Эдьигээн эбэҥки национальнай улууһа,

3 м. — Муома улууһа.

Юрий Балаганскай, быйылгы “Спортивные якутяне” спартакиада сүрүн судьуйата:

— Олунньуттан ыытыллыбыт 29 көрүҥү барытын кэриэтэ көрдүм. Быйыл кыттааччытын ахсаана лаппа эбиллибитэ харахха тута быраҕыллар. Былырыын бадминтоҥҥа 15 хамаанда эбит буоллаҕына, быйыл сүүрбэттэн лаппа тахса хамаанда кытынна. Бадминтонунан ханна баҕарар оонньуохтарын сөп, волан уонна ракетка да сыаната чэпчэки.

Успуордунан утумнаахтык дьарыктанар, тириэньэр баар улуустара тута биллэллэр. Холобур, баскетболга уолаттар, кыргыттар көрүҥнэригэр иккиэннэригэр Нерюнгри хамаандата бастаата. Финал иннинээҕи уонна финал оонньууларын көрбүтүм, букатын таһыччылар этилэр. Спартакиадаҕа кыттар саастаах күүстээх оҕолор түмүллүбүттэр. Биллэн турар, тириэньэрдэрэ иккиэн бастыҥынан ааттаннылар. Волейболга уолаттарга Нам хамаандата бастаата, кинилэр эмиэ олох таһыччы оонньууллар. Буоксаҕа эмиэ нерюнгрилар 16 ыйааһынтан 8 ыйааһыҥҥа финалистаахтар.

Улууска миэстэтигэр кыттааччы ахсаана, улуус биллэ эбилиннэ. Уонна спартакиадаҕа кыттар баҕаттан бэйэлэригэр суох көрүҥнэринэн дьарыктаналлара, сыыйа сайыннараллара кэрэхсэбиллээх.

Иннокентий Бояров, Таатта улууһугар гиирэ успуордун тириэньэрэ, 100 тыһ. солк. суумалаах сэртипикээти туппут дьонтон биирдэстэрэ:

— “Спортивные якутяне” күрэхтэһиигэ гиирэҕэ намнартан үс ахсаанынан хаалан иккис буоллубут, хаҥаластар үһүс миэстэлэннилэр.

Спартакиада чэрчитинэн көрүҥнэринэн бастыҥ тириэньэрдэри быһааран, бу курдук бириэмийэ олохтообуттара олус үчүгэй. Бириэмийэ тириэньэрдэр инники үлэлэригэр көҕүлүүр күүс буолара саарбахтаммат. Мин 12 сыл устата хамнаһа суох уопсастыбаннай тириэньэр быһыытынан үлэлээбитим. Уонна үөрэнэн, 2022 сылтан улууска улахан дьону, оҕолору эрчийэбин.

Былырыын өрөспүүбүлүкэҕэ биирдиилээн бастыыр иһин күрэхтэһиигэ иккис буолбуппут, ол иннинэ хамаанданан иккитэ бастаабыппыт, иккитэ үһүс миэстэ буолбуппут. Онон бастыҥнар кэккэлэригэр сылдьабыт.

Иван Тарасов, традиционнай оҕунан ытыыга бастакы миэстэни ылбыт Орто Халыма оскуолатын 10‑с кылааһын үөрэнээччитэ:

— Оҕунан ытыынан дьарыктаммытым үс сыл буолла. Орто Халымаҕа “Боотур” саалаҕа эрчиллэбин. Улууспутуттан оҕунан ытыыга иккиэ буолан кытта кэллибит. Улууска бу көрүҥү сэҥээрэр оҕо аҕыйах. Маҥнай бэйэм сөбүлээн дьарыктаммытым, икки сыллааҕыта тириэньэрим Надежда Ивановна Бережнова кэлэн күүскэ дьарыктаан эрэр.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
21 июля
  • 28°C
  • Ощущается: 28°Влажность: 39% Скорость ветра: 2 м/с

Сообщить об опечатке

Текст, который будет отправлен нашим редакторам: