«Чайковскай-фест. Якутск», аныгыскы көрсүһүүлэргэ диэри!

Бэҕэһээ, алтынньы 31 күнүгэр, уһулуччулаах композитор Петр Чайковскай төрөөбүтэ 185 сылынан ыытыллыбыт “Чайковский-фест. Якутск” бэстибээл ускуустуба маастардарын гала-кэнсиэринэн түмүктэннэ.

Бэстибээл бүппүтүнэн эмиэ да хараастыылаах, эмиэ да долгутуулаах киэһэҕэ көрөөччүлэр өрө көтөҕүллэн кэллилэр. Хаһан эрэ Петр Ильич кини айар айымньылара киэҥ сиринэн тарҕаныахтарын,  кини муусукатын таптыыр, уоскулаҥы ылар дьон элбиэн баҕарарын туһунан суруйбута. Дьэ, ол баҕата туолан, бэл, ыраах хотугу сиргэ, Саха сирин киин куоратыгар кини талааныгар сүгүрүйэллэр, кини айымньыларын репертуардарыгар киллэрэн үйэтитэллэр,  киэҥ географиялаах сүҥкэн бэстибээллэри ыыталлар.

Ол курдук, өссө  33 сыл анараа өттүгэр Опера уонна балет тыйаатыра диэн ааты ылбыт тыйаатыр бу сыанатыгар “Петр Чайковскай муусуката” диэн бастакы улахан бырайыагы олоххо киллэрэн,  бэстибээл тэриллибитэ. Бу сонун бырайыакка опера тыйаатырдарын ускуустубатын диэйэтэллэрэ, Новосибирскай, Красноярскай, Улан Удэ уонна Монголия  тыйаатырдарын сүрүн солистара кыттыбыттара.

Быйылгы “Чайковскай-фест. Якутск” бэстибээл РФ бэрэсидьиэни култуураны көҕүлүүр пуондатын өйөбүлүнэн тэрилиннэ.

Алтынньы 17 күнүттэн бэстибээл чэрчитинэн испэктээктэр, экскурсиялар, маастар-кылаастар, опера уонна балет сулустарын кытары айар көрсүһүүлэр буоллулар.

х х х

Гала-кэнсиэри Анна Фомина уонна Ньургун Бэчигэн иилээн-саҕалаан ыыттылар.

Ускуустуба маастардарын бастакы отделениета балет, иккис отделениета опера айымньыларыгар ананнылар. Онон, бүгүҥҥү дьоллоох көрөөччүлэр  бэстибээл ыҥырыылаах ыалдьыттарын, С.Омоллоон аатынан Опера уонна балет тыйаатырын сүрүн артыыстарын  толорууларын, этэргэ дылы, ытыска ууран олорон көрөр-истэр кыахтаннылар.

Ол курдук, ускуустубаҕа сүгүрүйээччилэр бастакы отделениеҕа Мариинскай тыйаатыр балетын сүрүннүүр артыыската Мария Буланова уонна  Башкортостан  Өрөспүүбүлүкэтин норуодунай артыыһа Рустам Исхаков (“Лебединое озеро”,  “Шехеразада”), СӨ үтүөлээх артыыската Юлия Мярина уонна  СӨ култууратын туйгуна Айтал Ефимов (“Барышня и хулиган”), СӨ култууратын туйгуна Анастасия Платонова  уонна СӨ норуодунай артыыһа Сарыал Афанасьев (“Спартак”), СӨ үтүөлээх артыыската  Динара Гасанбалаева, СӨ үтүөлээх артыыһа Ренат Хон уонна СӨ култууратын туйгуна Николай Попов (“Ромео и Джульетта”), СӨ үтүөлээх артыыската  Мария Кузьмина уонна СӨ үтүөлээх артыыһа  Валерий Аргунов (“Лебединое озеро”) итиэннэ тыйаатыр балетын, М.Посельская аатынан балет оскуолатын оҕолорун чаҕылхай толорууларын көрдүлэр.

Оттон гала-кэнсиэр икки отделениетыгар опера солистара: СӨ култууратын туйгуна Дария Шахурдина, Мариинскай тыйаатыр сүрүн солистката, Арассыыйа үтүөлээх артыыската Татьяна Павловская, “Новая опера” тыйаатыр солиһа, Хотугу Осетия-Алания  Өрөспүүбүлүкэтин үтүөлээх артыыһа  Алексей Татаринцев, Арассыыйа Улахан тыйаатырын солистката, Арассыыйа үтүөлээх артыыската  Агунда  Кулаева, СӨ үтүөлээх артыыската  Екатерина Корякина, СӨ култууратын туйгуна  Александр Степанов, СӨ норуодунай артыыһа  Юрий Баишев, СӨ норуодунай артыыстара  Александр Емельянов, Николай Попов, СӨ култууратын туйгуна Екатерина Захарова хатыламмат айымньыларын бэлэхтээтилэр.

Дирижердар – СӨ култууратын туйгуна  Артем Быстров, СӨ ускуустубатын үтүөлээх диэйэтэллэрэ Николай Пикутскай, Павел Васьковскай, СӨ култууратын туйгуна Максим Ноговицын.

СӨ култуураҕа уонна духуобунай сайдыыга миниистирэ Афанасий Ноев Мариинскай, Улахан тыйаатыр уонна С.Омоллоон аатынан Опера уонна балет тыйаатырын артыыстарыгар — бэстибээл кыттыылаахтарыгар наҕараадалары туттарда.

Бэстибээл хаамыытын, тэрээһиннэрин тэлэбидиэнньэҕэ, документальнай киинэҕэ үйэтитэр сыаллаах-соруктаах Арассыыйаттан анал хамаанда кэлэн үлэлээтэ. Онон бэстибээл гала-кэнсиэрин Саҥа дьыл бырааһынньыктарыгар “Саха” Национальнай Көрдөрөр-иһитиннэрэр хампаанньа тэлэбидиэнньэтигэр көрдөрүөхтэрэ.

Арассыыйа араас тыйаатырдарын кытары бииргэ үлэлээһин уопута, эрэгийиэннэр тыйаатырдарын сүрүн артыыстарын кытары биир сыанаҕа (С.Омоллоон аатынан Опера уонна балет тыйаатырын) үлэлээһин балекка уонна операҕа саҥаттан саҥа талааннар тахсан иһэллэригэр көмөлөөҕө саарбаҕа суох. Ону сэргэ, көрөөччү ускуустуба араас жанрын кытары билсиһэр, үрдүк ускуустубаҕа өйдүүн-санаалыын, дууһалыын тардыһар, билиитэ-көрүүтэ кэҥиир. Аныгыскы бэстибээлгэ диэри көрсүөххэ диэри!