«Чайковский фест. Якутск» бэстибээл арылынна. Күндү ыалдьыт буолуҥ.

Дойду тыйаатырдара аатырбыт “Щелкунчик” туруорууну репертуардарыгар киллэрэн, хайаан да көрдөрөллөр. Ол да курдук, Саха сиригэр  Петр Чайковскай төрөөбүтэ 185 сылыгар аналлаах “Чайковский фест. Якутск” опера-балет улахан  бэстибээлэ  эмиэ  бу туруоруунан саҕаланна.

Дьокуускай куорат олохтоохторо уонна ыалдьыттара икки күн устата  РФ уонна СӨ үтүөлээх артыыһа Екатерина Тайшина  саҥардан туруоруутугар, СӨ култууратын туйгуна  Андрей Быстров дирижердаах оркестр толоруутугар  “Щелкунчик” балеты Суорун Омоллоон аатынан Опера уонна балет тыйаатырыгар дуоһуйа көрдүлэр. Э.Гофман остуоруйатынан туруоруллубут балекка сүрүн оруоллары биһиги таптыыр артыыстарбыт: СӨ култууратын туйгуна, норуоттар икки ардыларынааҕы уонна Арасссыыйа куонкурустарын лауреата  Анастастия Платонова итиэиннэ СӨ норуодунай артыыһа  Сарыал Афанасьев чаҕылхайдык  толордулар.

Бэстибээл арыллыытыгар кэлбит көрөөччүлэри СӨ култуураҕа уонна духуобунай сайдыыга миниистирэ Афанасий Ноев, Опера уонна балет тыйаатырын дириэктэрэ Владислав Левочкин, тыйаатыр уус-уран салайааччыта,  сүрүн дирижера  Павел Васьковскай уонна  бэстибээл бырайыагын хос ааптара Мила Кудряшова (Санкт-Петербург) эҕэрдэлээтилэр.

Тыйаатыр дириэктэрэ:

“Биһиги бу улахан бырааһынньыкпытын тэрийэргэ көмөлөспүт дьоҥҥо, бастатан туран, РФ бэрэсидьиэнин култуураны көҕүлүүр пуондатыгар, ону сэргэ Санкт Петербурдааҕы биир идэлээхтэрбитигэр, бэстибээл пуондатыгар, улаханнык махтанабыт. Эһиэхэ үчүгэй настырыанньаны,  улуу Чайковскай муусукатыттан уонна артыыстарбыт толорууларыттан  улахан дуоһуйууну ыларгытыгар баҕарабын”, — диэн эҕэрдэлээтэ.

Бэстибээл бырайыагын хос ааптара, “Боотур тыйаатыра” киинэ режиссера Мила Кудряшова бүгүн кинилэргэ уһулуччулаах күн буолбутун уонна Саха сирин тыйаатырдарын устуоруйатын суруйар, көрдөрөр хамаандалаах кэлбитин туһунан иһитиннэрдэ.

Алтынньы 31 күнүгэр диэри салҕанар бэстибээл бырагырааматыгар киирбит туруорууларга дойду сүрүн тыйаатырдарыттан, ол иһигэр Мариинскай уонна Улахан тыйаатыртан ыҥырыллан кэлбит солистар кыттыахтара.  Мариинскай тыйаатыртан  С.Рахманинов аатынан аан дой­дутааҕы пианистар, дирижёрдар уонна композитордар II куонкурустарын лауреата, дирижёр Алексей Асланов; П.И.Чайковскай аатынан XVII аан дойдутааҕы куонкурус лауреата, баас куоластаах ырыаһыт Глеб Перязев; биир дойдулаахпыт, СӨ үтүөлээх ырыаһыта Григорий Чернецов;  сопрано куоластаах, аан дойдутааҕы, Бүтүн Арассыыйатааҕы таһымнаах куонкурустар лауреаттара, икки Грэмми бириэмийэ лауреата  Татьяна Павловская, балет үҥкүүһүтэ Мария Буланова, пианист, Осетия-Алания Өрөспүүбү­лүкэтин үтүөлээх артыыһа, биллиилээх концертмейстер Анатолий Кузнецов; Башкирия норуодунай артыыһа, балет солиһа, Бүтүн Арассыыйатааҕы куонкурустар лауреаттара Рустам Исхаков  бэстибээл испэктээктэригэр сүрүн баартыйалары толоруохтара.

Маннык баай ис хоһоонноох, киэҥ хабааннаах бэстибээл туруорууларыгар сылдьыҥ, дойду улахан тыйаатырдарын сүрүн артыыстара уонна биһиги тыйаатырбыт холбоһуктаах бырайыактарын сэргээҥ, бэйэҕитигэр умнуллубат түгэни бэлэхтээҥ.