Ааптар хаартыскаҕа түһэриитэ
Бүгүн Чурапчы улууһугар өрөспүүбүлүкэ Бырабыыталыстыбатын Бэрэссэдээтэлин бастакы солбуйааччы Дьулустан Борисов салайааччылаах бырабыыталыстыба отчуоттуур бөлөҕө үлэтин салгыыр. Ол курдук, дьоҕус бөлөхтөр Сылаҥ, Хатылы, Чакыр нэһилиэктэригэр отчуоттуу тиийдилэр.
Бөлөхтөрү тыа хаһаайыстыбатын уонна аска-үөлгэ бэлиитикэтин миниистирин солбуйааччы Сахаяна Павлова, экэниэмикэ миниистирин солбуйааччы И.Е.Елисеев, тырааныспар уонна суол хаһаайыстыбатын миниистирин солбуйааччы С.Н.Коркин салайаллар.
Чакыр нэһилиэгэр отчуоту С.Павлова туруорда. Мунньаҕы улуус баһылыга Степан Саргыдаев салайда.
Үгэс курдук, бастыҥ үлэһиттэри наҕараадалаатылар. Ол курдук, Дария Егорова, Илья Неустроев, Николай Григорьев, Нюргун Шишигин үөрүүлээх быһыыга-майгыга наҕараадалары туттулар.
Ил Түмэн дьокутаата Д.Поисеев кыттан, ыытыллар үлэ туһунан билиһиннэрдэ. Чуолаан, Чакырга оскуола тутуутун боппуруоһун таарыйдылар. Бырайыак-смета докумуона ситтэҕинэ, тутуллар кыахтаах эбит. Онон биэс сиринэн үөрэнэ олорор дьоҥҥо сэргэх сонун буолла.
Олохтоохтор эбии үөрэхтээһин педагогтарын хамнаһа учууталлары кытта хаһан тэҥнэһиэн сөбүн ыйыттылар. Иһэр уу мөлтөҕүн туһунан этилиннэ. Манна улуус дьаһалтата бары нэһилиэктэргэ уу анаалыһын оҥотторбутун туһунан Степан Саргыдаев чопчулаата.
Салгыы хамнаска сыһыаннаах ыйытыылар киирдилэр. Онно үп миниистирин солбуйааччы Федор Ноговицын сиһилии хоруйдаата. Эдэр учуутал Руслан Русланович манна бэһис сылын үлэлиир эбит. Ханна олохсуйа хааларын өссө да быһаарбакка сылдьар эбиттэр бу ыал. Онон түргэнник оскуола-сад тутулларыгар көрдөстө. Николай Неустроев сааҕа-саадахха сыһыаннаах ыстарааптааһын тула санаатын эттэ.
Уот арахсыытын боппуруоһугар улуус баһылыга дизеллэри уларытыы инвест бырагыраамаҕа киирбитин, онон 8 дизель саҥардыллыахтааҕын эттэ. Оҕолор атын сиргэ үөрэнэ барбаттарын туһугар булгуччу оскуоланы тутуохха, нэһилиэги эһимиэххэ диэн Николай Адамов туруоруста, инники этиилэри тоһоҕолоон ыйда.
Иннокентий Адамов сүөһү иитээччи эрэйэ тиллэрин курдук эт-үүт сыаната үрдээтин диир. Тыа хаһаайыстыбатыгар Степан Саргыдаев Мырылаҕа 34-35 саастаах эдэр дьон үлэлии олороллорун холобурдаата. «Барыта бэйэбит илиибитигэр баар, үлэлиэххэ эрэ наада»,— диэн чопчулаата улуус баһылыга С.Саргыдаев.
Оскуола дириэктэрэ Александра Неустроева 21 кыбартыыралаах уопсай дьиэ тутуллубутун иһин дьокутааттарыгар Поисеев Д.Н. уонна улуус баһылыгар С.А.Саргыдаевка махтанна. Ситэриилээх былаас үлэтин сөптөөҕүнэн аахта, сайдыы инники барарын бэлиэтээтэ. «Бэртээхэй сахалыы отчуоту иһиттибит»,— диэтэ Николай Кириллин уонна бүгүҥҥү мунньахтан оскуола тутуллар буолла диэн эрэннибит диэтэ.
Онон чакырдар тыын кыһалҕаларын тоһоҕолоон туран туруорсан, ситэриилээх былаас отчуотуттан эрэл санаалаах тарҕастылар.
Ааптар хаартыскаларга түһэриитэ
Бу нэдиэлэҕэ сатыылаабыт куйаас күннэр атырдьах ыйын биллэрбэккэ, от ыйын санатан ыллылар. Ол эрээри күһүн…
Бу күннэргэ Өймөкөөн сэлиэнньэтигэр халаан уутуттан улаханнык эмсэҕэлээбит ыал олбуорун иһигэр балааккаҕа оһох оттунан, ас…
“Анаабыр алмаастара” хампаанньа алмааһы хостуур бириискэлэригэр сүүһүнэн киһи үлэлиир. Манна үлэ икки симиэнэнэн күнүстэри-түүннэри күөстүү…
Кэлиҥҥи сылларга араас кэмҥэ оскуоланы бүтэрбит дьон, ким ханнык улууска олороруттан тутулуга суох, оскуоланы бүтэрбит…
Саха сиригэр РФ үтүөлээх, өрөспүүбүлүкэ образцовай “Кэнчээри” ырыа-үҥкүү ансаамбылын билбэт киһи суоҕун кэриэтэ буолуохтаах. Бүгүн…
Дьокууускай уонна Нижнекамскай куораттар бырааттыы, доҕордуу сыһыаҥҥа, сибээһи ыкса тутарга меморандумҥа илии баттастастылар. Татарстаннааҕы нефтехимическэй…