Чаппанда орто оскуолатын 1975 сыллаахха бүтэрбиттэр көрүстүбүт 

Бэс ыйын 23-24 күннэригэр Ньурба улууһун  Чаппанда орто оскуолатын 1975 сыллаахха 10-с кылааһы бастакынан бүтэрбиппит 50  сыллаах үбүлүөйүн  33 буолан бэлиэтээтибит.

Бу бэлиэ күммүтүн көрсүһүү эрэ буолбакка, олох киэҥ аартыгар кынаттаабыт оскуолабыт, үөрэппит  ытыктыыр, убаастыыр учууталларбытыгар, интэринээт иитээччилэригэр, олорбут, үөрэммит нэһилиэкпит иннигэр 50 сыл буолан баран, олохпут отчуотун кэпсиир тэрээһиннэри ыыттыбыт.

Бастакы күн Чаппанда оскуолатыгар кылаас чааска олохтоох оскуола учууталларын, быйылгы оскуоланы бүтэрээччилэри, үөрэппит ытык кырдьаҕас учууталларбытын кытта истиҥ көрсүһүү буолла. Олох киэҥ аартыгар сырдыкка, үтүөҕэ такайан атаарбыт,  саас баттаабыт хаар маҥан баттаахтаах ытык-мааны учууталларбыт, дьоһун дьон буолбут үөрэнээччилэриттэн астынан, үөрэн чаҕылыспыт харахтарын көрөргө үчүгэйин.
Киэһэтин «Дьоҕур» норуот айымньытын дьиэтигэр нэһилиэнньэҕэ «50 сыл кэнниттэн… умнуллубат 10 кылаас» диэн  ырыа-тойук, үҥкүү-битии босхо кэнсиэрин көрдөрдүбүт.
Кэнсиэр кэмигэр үлэбит-хамнаспыт, эбии дьарыкпыт туһунан кэпсиир хаартыскаларынан слайда оҥорбуппутун көрдөрдүбүт.
Кэлбит ахтар-саныыр нэһилиэкпит дьоно сэргэхсийэн, үҥкүүлээн, оһуохайдаан, өр сылларга көрсүбэтэх кылаас оҕолорун көрсөн ис сүрэхтэриттэн үөрэн-көтөн тарҕастылар.
Манна даҕатан кэпсээтэххэ,.оччолорго сорох нэһилиэктэргэ 8 кылаастаах оскуола буолан, 9-10 кылаастарга атын орто оскуолаларга интэринээккэ олорон үөрэнии буолара.

Ол курдук 1974 сылтан Чаппандаҕа 9-10 кылаастар аһыллыбыттарыгар Дьаархантан, Дьиикимдэттэн, Ньурбаттан, Антоновкаттан, Өлүөхүммэттэн кэлэн, 60-ча оҕо икки кылааһынан үөрэммиппит.
Бу 50 сыл тухары ол оҕолор олох устун араас үөрүүлээх, хомолтолоох да түгэннэрбитигэр атааннаһыыта суох бииргэ тутуспутунан өйөһөн-өйдөһөн кэллибит. Тэрээһиммит да ол курдук түмсүүлээхтик, көхтөөхтүк ааста.

Биһиги ортобутугар бааллар араас идэлээх Арассыыйа, Саха Өрөспүүбүлүкэтин, улуус, нэһилиэк киэн туттар туруу үлэһит дьонноро.
Ким да чыынынан-хаанынан үтүөмсүйбэт, биир тэҥ сомоҕо буолан, бииргэ тутуспутунан баччаҕа диэри иллээх кылаас буоларбытыгар кылааспыт салайааччыта Елизавета Ивановна Игнатьева өҥөтө улахан.
Дьылҕабар олуһун диэн махтанабын, дьоллонобун, олохпор маннык үтүө-мааны оҕо сааһым доҕотторун көрүһүннэрбитигэр.

Павлина Кырбасова, 
1975 сыллаах Чаппанда орто оскуолатын 10 кылааһын маҥнайгы бүтэрээччитэ, 
Бүлүү