Чараҥнааҕы тыйаатыр устуудьуйата үрдүк ситиһиилэннэ

Уус Алдан улууһун Илья Находкин аатынан Чараҥ култууратын киинин иһинэн үлэлиир “Манчаары” тыйаатыр устуудьуйата  (салайааччы Екатерина Свинобоева) “Бастакы хараҥаччы”  диэн  норуоттар икки ардыларынааҕы ускууустуба куонкуруһугар I истиэпэннээх лауреат аатын сүктэ.

Кинилэр СӨ Суруйааччыларын сойууһун чилиэнэ Галина Борисова-Толбооно суруйбут «Уһун Уйбаан олоҥхоһут» олоҥхотун “Ураанньык аттаах Тайыыла олоҥхоһут” диэн инсценировкалаан туруорбут мусукаалынай испэктээгинэн кытыннылар.

Олоҥхону туруорууга тыйаатыр устуудьуйатын, Чараҥнааҕы Култуура киинин үлэһиттэрэ, нэһилиэк олохтоохторо, уус-уран айар эйгэ кыттыылаахтара, үөрэнээччилэр уонна улуустааҕы “Мүрү саһарҕата” хаһыат үлэһиттэрэ кытыннылар.

Сүрүн оруоллары толордулар: Тайыыла олоҥхоһут — Даниил Атласов, Дьиэлээх Хотун — Екатерина Захарова, Дьиэлээх Тойон — Александр Васильев, кыыстара Күннэй — Леонида Иванова, чаҕар кыыс — Алексанна Петрова, түөкүттэр — Иван Окоемов, Василий Черкашин, Абааһы — Игнатий Слепцов уо.д.а. толордулар.