Чэгиэн буолуҥ

Чөл, чэгиэн буолар, этэҥҥэ сылдьар туһугар бэйэбитигэр болҕомтолоох буоларбыт, доруобуйабытын көрүнэрбит ирдэнэр.

Маныаха араас сүбэлэр бааллар.

Тыл атын дьүһүнүнэн бүрүллүүтэ куртах, оһоҕос куолаҕайа уонна бүөр үлэтэ кэһиллиитин быһаарар диэн суруйаллар.

Тылга тиис суола хаалара — оһоҕоско баар микрофлора ахсаанын састааба уларыйыытын, уоргаҥҥа шлак үөскээһинин сибикитэ. Маннык түгэҥҥэ ас эрэсиимин уларытар наада уонна арыылаах-сыалаах аһы аһыыртан туттунуллуохтаах.

Киһи тыла титирэстиирэ ньиэрбэтиттэн тутулуктаах. Дьиэҕит-уоккут, үлэҕит-хамнаскыт  быһыытын-майгытын тупсарарга, олоххут сиэрин уларытарга дьулус.

Тыл хайыта барара эндокриннай систиэмэ, хаан, бүөр ыарыытын туоһулуон сөп. Маннык түгэҥҥэ идэлээх дьон сүбэтинэн эмтэнэр, хайаан да көрдөрөр ордук.

Уорган үлэтэ ыһыллыыта — амтаны билии мөлтөөһүнэ.Тылга аһыыны, минньигэһи, туустааҕы, мүлүркэйи билэр рецептордар бааллар. Өскөтүн киһи ити амтаннары сатаан ылбат буоллаҕына, ньиэрбэтэ уона эндокриннай систиэмэтин үлэтэ кэһиллибит буолуон сөп.

Саха ыалын халандаарыттан, 2015 с.