Чөлүгэр түһэрэр үлэ салҕанар

Саха сиригэр халаан уута аҕалбыт содулун туоратар үлэ салҕанар. Эрэгийиэҥҥэ ыксаллаах быһыы-майгы эрэһиимэ биллэриллэн турар.

СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников иһитиннэрбитинэн, эмсэҕэлээбит улуустарга бырабыыталыстыба чилиэннэрэ састааптаах анал хамыыһыйалар үлэлииллэр.

“Барыларыттан ордук Өймөкөөн улууһа, хас да нэһилиэгэ эмсэҕэлээтэ. Манан сүрүн сорук – массыына суолун оҥоро уонна 13 улуустан, Дьокуускайтан хомуллубут биригээдэлэри аҕала охсуу”, — диэн тоһоҕолоон бэлиэтээтэ Дмитрий Садовников.

Маны тэҥэ кини оптоволоконнай лиинийэ сорох сиринэн алдьаммытынан, интэриниэт ситимэ мөлтөөн ылара ыарахаттары үөскэтэрин бэлиэтээтэ. Сибээс үлэһиттэрэ алдьаныылары оҥоро сылдьаллар.

“Өссө биир наадалаах соругунан докумуон үлэтэ буолар – докумуоннары бигэргэтиигэ нэһилиэнньэни кытта хамыыһыйа уонна муниципальнай субъектар хамыыһыйалара үлэлэһэллэр. Күн бүгүн бу хайысханан үлэ бара турар», — диэн СӨ бырабыыталыстыбатын бэрэссэдээтэлин бастакы солбуйааччы Дмитрий Садовников эппитин СӨ Ил Дархан, бырабыыталыстыба пресс-киинэ иһитиннэрэр.