Хаартыска: Евдокия Захарова тиксэриитэ.
Бу күннэргэ Өймөкөөн улууһугар от ыйыгар уһун ардахтан халааннаан, дьон олорор дьиэтин, оҕуруотун барытын уу ылбыта.
Айылҕа иэдээнэ аҕалбыт үгүс хоромньутун туоратаары үгүс улуустартан тутуу биригээдэлэрэ кэлэн үлэлээн бардылар. Тутуу биригэдэлэрин Өймөкөөн орто оскуолатын интэринээтигэр олортулар, күҥҥэ үстэ аһаттылар.
От ыйынааҕы улахан халаан кэнниттэн уһун ардахтан сылтаан, Өймөкөөн нэһилиэгэ аны атырдьах ыйыгар иккистээн ууга барда. Билигин чөлүгэр түһэрии үлэтигэр Амма уонна Таатта улуустарын биригээдэлэрэ, быыһааччылар бөлөхтөрө, араас биэдэмистибэлэртэн кэлбит дьон тэтимнээхтик үлэлии сылдьаллар. Элбэх киһи аһыыр аһын-үөлүн олохтоох дьаһалта өрөспүүбүлүкэ олохтоохторуттан кэлбит гуманитарнай көмөттөн ылан тэрийбитэ. Биллэн турар, күн аайы наар эт кэнсиэрбэтинэн аһыы сылдьыбыт дьон салҕар буоллахтара. Ол ону өйдөөн, учуоттаан, бу күннэргэ Биэрэк Үрдүн олохтооҕо Евдокия Захарова биир ынаҕын идэһэлээн, ыарахан үлэҕэ сылдьар дьоҥҥо анаата.
— Быйыл Өймөкөөн нэһилиэгин олохтоохторо олус ыарахан балаһыанньаҕа киирбиппитин өйдөөн, өрөспүүбүлүкэ араас улуустарыттан кэлэн үлэлии сылдьар дьоммутугар махтанан туран, «туох кыалларынан … » диэн санаанан салайтаран, мин эмиэ көмөлөһөргө сананным. Ыраах сиртэн кэлбит уолаттар биһиги Өймөкөөммүт дьоно кыстыгы этэҥҥэ туоруулларын туһугар элбэх дьиэ акылаатын оҥорон, тупсаран бардылар, билигин да үлэлии сылдьаллар. Түгэнинэн туһанан, кылгас кэм иһигэр тэрээһиннээх үлэни ыыппыт өрөспүүбүүкэ уонна улууспут салайааччыларыгар, бэйэлэрин дьоннорун көмөҕө ыыппыт улуустар баһылыктарыгар биһиги Өймөкөөммүтүгэр улахан болҕомтолорун уурбуттарыгар барҕа махталбын тиэрдэбин. Өрүү маннык сомоҕолоһуулаах буолуохха диэн туран, бэйэм кытаанах үлэҕэ сылдьар тутуу биригээдэлэрин дьоно тото-хана эттээх миини истиннэр диэн биир сүөһүнү спонсордаатым.
Кыахпыт тиийэринэн нэһилиэкпитин чөлүгэр түһэрэн, салгыы сайдар суолу тутуһуохпут этэ буоллаҕа, — диэн санаатын үллэһиннэ Евдокия Винокурова. Евдокия Захаровна олох соторутааҥҥа диэри саха ынаҕын боруодатын ииттэ сылдьыбыта. Пиэрмэр быһыытынан дьонугар-сэргэтигэр өрүү көмөлөһө сылдьар киһи. Евдокия Захаровнаҕа Өймөкөөн нэһилиэгин олохтоохторун уонна өрөспүүбүлүкэ араас улуустарыттан кэлэн үлэлии сылдьар тутуу биригээдэлэрин тутааччыларын ааттарыттан баһылык Павел Васильев истиҥник махтанна.
Ити курдук, үтүө санаалаах дойдуларыгар бэриниилээх дьон баар буолан, ыраах да чугаһыыр, ыарахан да чэпчиир.
Бу сыллар усталарыгар "Биир ньыгыл Арассыыйа" бэлитиичэскэй баартыйа Арассыыйа норуотун түмсүүлээҕин уонна судаарыстыба тутаах соруктарын…
Бүгүн, ахсынньы 1 күнүгэр, Бүлүү өрүһүнэн 4 туоннаҕа тиийэ ыйааһыннаах массыыналар айаннара-сырыылара саҕаланна. Ол туһунан…
Кэбээйи улууһун Ньидьили нэһилиэгэр "Олоҥхо дьиэлэрин ситимэ" диэн СӨ Ил Дархана Айсен Николаев ыйааҕынан 2022…
Автоиниспиэксийэлэр суол быһылаанын көрбүт дьону көрдүүллэр. Сокуоннай сааһын туола илик оҕо бэлисипиэтинэн баран иһэн ДТП…
Сэбиэскэй кэмҥэ үүнээйи арыыта диэн суоҕун кэриэтэ этэ, ол оннугар дьааһыгынан “комбижир” диэн кэлэрэ. Алаадьыны,…
Саха сиригэр ахсынньы 4-25 күннэригэр байыаннай дьайыы кыттыылаахтарыгар уонна кинилэр дьиэ кэргэттэригэр бэйэлэрин баҕаларынан көмөлөһөөччүлэр…