“Чөмчүүк таас” 10 сыла

Бу күннэргэ Пригороднай сэл. 22 №-дээх «Чөмчүүк таас» оҕону сайыннарар киин, оҕо уһуйаана   үлэлээбитэ 10 сыла туолла.

 

Бу сыллар устата уһуйаан уопсайа 27 бөлөҕү, уопсайа 780 оҕону үөрэх-билии эйгэтигэр атаарда. Элбэх ситиһиилээхтэр, ол курдук   Бүтүн Арассыыйатааҕы көрүү күрэххэ «Бастыҥ уһуйаан» аатын ылбыттар, «21 үйэ бастыҥ үөрэх тэрилтэтэ «Лига Лидеров» , «Сыл бастыҥ уһуйаана», өрөспүүбүлүкэ иһинэн ыытыллар «Бастыҥ тыа уһуйаана», «Народнай бюджет» диэн күрэхтэһиилэргэ  «Туустаах хос», «Олоҥхо сирэ» диэн бырайыактарынан кыайбыттар, ону таһынан «Экошаг» диэн грантовай күрэхтэһии кыайыылааҕын аатын сүкпүттэр. Уһуйааг үлэһиттэрэ маны таһынан элбэх кинигэни, иитээччилэргэ аналлаах методичкалары таһаараллар.

1 категориялаах иитээччи Надежда Никифорова идэтин, уһуйаан инники былаанын сэһэргээтэ:

-Мин санаабар иитээччи оҕону таптыыр, тулуурдаах, дьулуурдаах, идэҕэ бэриниилээх, бэйэтин сайыннарар, инникигэ тардыһар күүстээх, кэми кытта тэҥҥэ хардыылыыр буолуохтаах.

Инники былааммыт киэҥ, онтон сүрүннэрэ маннык:

1.Доруобуйатынан хааччахтаах  оҕолорго анаан көмөлөһөр хайысхалаах бөлөхтөрү арыйыы;

2. Таһырдьа оҕолор оонньуур былаһааккалырын тупсарыы, аналлаах миэбэлинэн хааччыйыы;
3. Уһуйаан үлэһиттэрин, иитээччилэр үөрүйэхтэрин үрдэтии (квалификацияны үрдэтэр куурустар, анал үөрэхтэргэ ыытан сайыннарыы);
4. Оҕону сайыннарар хайысхалаах эбии төлөбүрдээх куруһуоктары арыйыы”.

Уһуйаан 10 сыллаах үбүлүөйүн үрдүк таһымнаахтык алтынньы ый 24 күнүгэр бэлиэтээбит. Кинилэр үөрүүлэрин үллэстэ Ил Түмэнтэн дьокутаата  А.А.Григорьева,   үөрэхтээһин управлениятын начаалынньыга М.П. Петрова, Пригороднай нэһилиэк баһылыга В.Н.Жексембаев, куораттааҕы үөрэх профсойууһун салайааччыта С.А. Софронеев, социальнай партнердар уонна да атын бииргэ алтыһар, чугас дьонноро, төрөппүттэрэ ыалдьыттаабыттар.