«Чөмпүйүөннэр бааллара» ахсынньы 21 күнүгэр ыытыллыаҕа

Ахсынньы 21 күнүгэр Дьокуускайга «Өрөгөй» успуорт комплексыгар «Чөмпүйүөннэр бааллара» ыытыллыаҕа. Тэрээһин Саха сиригэр физкультурнай хамсааһыны төрүттээбит Николай Тарскай төрөөбүтэ 100 сылыгар ананыаҕа. Бу туһунан СӨ Успуордун министиэристибэтэ иһитиннэрэр.

Үөрүүлээх тэрээһиҥҥэ биллэр-көстөр спортсменнар, тириэньэрдэр, успуорт индустриятын бэрэстэбиитэллэрэ 2024 сыл түмүгүн таһаараары мустуохтара.

Ыҥырыылаах ыалдьыттары култуурунай бырагыраама күүтэр. «Азия оҕолоро» ахсыс сайыҥҥы оонньууларга, Саха сириттэн Олимпиадаҕа кыттыбыт дьоҥҥо, Кыргызстаҥҥа ыытыллыбыт хапсаҕайга аан дойду чөмпүйэнээтигэр уо.д.а. улахан тэрээһиннэргэ анаммыт корнердар тэриллиэхтэрэ.

Шоу-перформанс туруоҕа, манна биллэр-көстөр спортсменнар — сүүрүүк Сардаана Трофимова, охчут Степанида Артахинова, кроссфит-атлет Игнатий Чомчоев, многоборец Борис Сдвижков кыттыыны ылыахтара.