«Чөмпүйүөннэр бааллара»: Саха сиригэр сыл бастыҥ күрэсчиттэрэ биллиэхтэрэ

Быйылгы тэрээһиҥҥэ физкултуура уонна успуорт эйгэтигэр хас да саҥа анал аат туттарыллыаҕа.

Сыл бастыҥ күрэсчиттэрин, ону тэҥэ эйгэ үлэһиттэрин ааттара ахсынньы 20 күнүгэр киэһэ 18:00 чаастан Дьокуускайга «Сэргэлээх уоттара» култуура киинигэр биллиэхтэрэ. СӨ Физическэй култуураҕа уонна успуорка министиэристибэтэ саҥа анал ааттары олохтоото.

Быйылгы «Чөмпүйүөннэр баалларыгар» олимпийскай, национальнай уонна адаптивнай  успуорт көрүҥнэригэр эр дьон уонна дьахталлар ортолоругар бастыҥ  күрэсчиттэр ааттаныахтара. Дьүүллүүр сүбэ мунньахтаан, анал ааттар хаһаайыттарын номнуо быһаарда.

Өрөспүүбүлүкэбит  күрэсчиттэрэ быйыл тустууга, дзюдоҕа, чэпчэки атлетикаҕа, мас-рестлиҥҥэ, оҕунан ытыыга, боксаҕа, дуобакка, пауэрлифтиҥҥэ уонна да атын успуорт көрүҥнэригэр үрдүк ситиһиилэри көрдөрдүлэр.

Маны таһынан үөрүүлээх киэһэҕэ «Сыл бастыҥ тириэньэрэ», «Успуорка бэриниитин иһин», «ГТО бастыҥ тэрийээччитэ», «Успуорт бастыҥ уопсастыбаннай тэрийээччитэ», «Бастыҥ эрэгийиэннээҕи успуорка федерация», «Бастыҥ муниципальнай оройуон», «Сыл бастыҥ судьуйата», «Успуорт бастыҥ кэтээн көрөөччүтэ», «Сыл мецената», «Биһиги кэммит дьоруойдара», «Саха сирин киэн туттуута», «Чөл туругу тэрийии», «Бастыҥ успуорт оскуолата», «Бастыҥ бэтэрээн-күрэсчит», «Успуорт тэрээһиннэрин бастыҥ волонтера» уонна «Успуорт событиеларын сахалыы бастыҥ сырдатыы иһин» анал ааттар туттарыллыахтара.

«Чөмпүйүөннэр баалларын» режиссерынан СӨ Култууратын уонна ыччат бэлиитикэтин туйгуна Михаил Степанов үлэлиир. Тэрээһини Николай Гоголев уонна Анна Фомина ыытыахтара.