Чэпчэки атлетика: Беларустар Кыайыы өрөгөйүн биллилэр

Бүгүн «Туймаада» стадиоҥҥа «Азия оҕолоро» норуоттар икки ардыларынааҕы оонньуулар чэпчэки атлетикаҕа түмүктүүр күрэхтэһиигэ кыргыттар уонна уолаттар 4х400 миэтирэҕэ эстафетаҕа сүүрдүлэр.

4х400 миэтэрэҕэ эстафета диэн чэпчэки атлетикаҕа 4-түү киһилээх хамаанданан сүүрүү буолар. 4 спортсментан турар хамаанда 1600 миэтэрэни паалочканы бэрсэн сүүрэн, финишкэ диэри тиийиэхтээх. Бүгүн эстафетаҕа Саха сирин, Казахстан, Кыргызстан, Узбекистан, Беларусь, Азербайджан, Уһук Илин, Сибиир уонна Урал федеральнай уокуруктар спортсменнара кытыннылар.

Бэҕэһээ спортсменнар 400 миэтирэ уһуҥҥа мэһэйдээх сүүрүүгэ, 3000 миэтирэҕэ, 4х100 миэтирэҕэ эстафетаҕа сүүрбүттэрэ, уһуну ыстаныыга уонна «куобахха» ыстаныыга күрэхтэспиттэрэ. Чэпчэки атлетикаҕа кыргыттарга 3000 м дистанцияҕа Узбекистантан Анастасия Сильченкова кыайбыта. Оттон уолаттарга Уһук Илин федеральнай уокуруктан Георгий Шумков бастаабыта, кини бу иккис кыһыл көмүһэ буолар.

Оттон Москваттан сылдьар Анна Андреева «Азия оҕолоро» оонньууга 18,48 миэтирэ ыстанан үһүс рекордун оҥордо, кини «куобахха» иннин кимиэхэ даҕаны биэрбэтэ. Кини троеборьеҕа көрдөрүүтэ – 65,96 м. Үрүҥ көмүһү уонна боруонсаны Саха сирин сүүмэрдэммит хамаандатыттан Дарья Громова уонна Маргарита Тумакова ыллылар.

Саха сирин хамаандатыттан Максим Семенов ыстаҥаҕа кыһыл көмүс мэтээли ылбыта, троеборье түмүгүнэн рекорд олохтоото – 114,53 миэтэрэ. Үрүҥ көмүһү Саха сириттэн Марк Никитин, оттон боруонсаны – Казахстан спортсмена Глеб Клепинин ылбыттара. Ыраахха ыстаныыга Уһук Илин федеральнай уокуруктан Лев Кукушкин уонна Москваттан Дарья Ветрова бастаабыттара.

Эстафетаҕа Беларусь хамаандата бастыҥ көрдөрүүлээх, 400 м уһуҥҥа мэһэйдээх сүүрүүгэ Екатерина Новик уонна Лев Кукушкин тэҥнээхтэрин булбатахтара.
3000 миэтирэ уһуҥҥа сүүрүүгэ кыргыттарга бастыҥ көрдөрүүнү Узбекистантан Анастасия Сильченкова, уолаттарга Георгий Шумков көрдөрөн кыайыы өрөгөйүн билбиттэрэ.
Хомойуох иһин, бэҕэһээ биһиги иккис хамаандабыт кыыһа фальстарт оҥорон Саха сирин хамаанадата күрэхтэһииттэн туораабыта.

Узбекистан хамаандатын кыыһа эстафетаҕа бэрсэр палочканы биэрэригэр сыыһан, эмиэ хамаандалара туорабыта. Онон эстафета кыайыылааҕынан Беларусь хамаандата тахсыбыта.
Бүгүн эмиэ Беларусь хамаандата күннээтэ, 3 м 51,87 с көрдөрүүлээх кыайыыны ситистэ. Старка аан бастаан кыргыттар тахсыбыттара. Иккис миэстэни Сибиирдээҕи федеральнай уокурук, үсүһү Урал федеральнай уокурук сүүрүүктэрэ ыллылар.

Уолаттарга эмиэ Беларусь хамаандата бастаата. Иккис миэстэҕэ Сибиир федеральнай уокурук, үһүскэ – Уһук Илин федеральнай уокурук ылары ситистэ.
Хомойуох иһин, уолаттарга Саха сирин биир хамаандатын сүүрүүгэ эстафетаҕа фальстарт оҥорон хамаандатын күрэхтэһииттэн туоратта.