Чэпчэки харчы эдьиийдии-балыстыы кыргыттары суукка тириэрдибит…

2025 сыл олунньу ыйыгар 24 саастаах Сунтаар улууһуттан төрүттээх кыыс куйаар ситимин нөҥүө кэпсэтэн, тэрээһиннээх бөлөххө уурааччы (закладчица) быһыытынан үлэлии киирбит.
Кулун тутарга балтыгар, 19 саастаах өрөспүүбүлүкэ биир коллеһын устудьуоҥкатыгар, харчы иһин сокуону кэһэн туран наркотигынан эргиниигэ этии киллэрбит.
Эмиэ бу сыл муус устар 15 күнүгэр 24 саастаах кыыс «оператор» ыйыытынан, Мэҥэ Хаҥалас улууһун биир сэлиэнньэтин таһыгар ойуурга кистэлэҥ сиртэн наркотик баартыйатын Дьокуускайга аҕалбыт. Итиэннэ муус устар 17 күнүгэр балтын кытары дозаларынан араартаабыттар.
Муус устар 20 күнүгэр 24 саастаах кыыс тутуллубут уонна олорор сириттэн 0, 886 гр. наркотик булуллубут. Муус устар 22 күнүгэр күнүс иккис кыыс тутуллубут, кини уопсайа 116, 047 гр. наркотиктаах эбит.
Суут кэмигэр кыргыттар буруйдарын толору билиммитэр.
Дьокуускай куораттааҕы суут бириигэбэри таһаарарыгар буруйу сымнатар быһыы-майгы быһыытынан силиэстийэлээһиҥҥэ кыргыттар көмөлөспүттэрин, буруйдарын толору билиммиттэрин, кэмсиммитэрин, ыарыһах аймахтарын көрөллөрүн, эдэр саастарын учуоттаабыт.
Кыргыттар сууттанан, хастыы да сылга хаайыллар буоллулар. 24 саастаах кыыс кыра оҕолоох буолан, оҕото 14 сааһын туолбутун кэннэ суут бириигэбэрэ олоххо киирэр буолла. 19 саастаах кыыс суут саалатыттан хаайыыга ыытылынна. Бу туһунан СӨ Үрдүкү Суутун пресс-сулууспата иһитиннэрдэ.
Сообщить об опечатке
Текст, который будет отправлен нашим редакторам: