Чэпчэки сыаналаах диэн киирэн биэримэҥ

Саҥа дьыл иннинэ түөкүттэр эмиэ үөмэхтэһэ түстүлэр.

MWS Cloud информационнай куттал суох буолуутун сүрүн эспиэрэ Илона Кокова РИА Сонуннарга бырааһынньык иннинэ саамай тарҕанар албыннааһыннар тустарынан кэпсээтэ.

Бу кэмҥэ биллэр маркетплейстар ааттарын туһанан «90%-ҥа диэри чэпчэтиилээх», «остуоруйаҕа эрэ баар сыананан» бэлэх набордары атыылыыр, ону тэҥэ «барыстаах» оонньотуулардаах уонна «бүтэрэ биэс мүнүүтэ эрэ хаалла» аахсыйалардаах албын саайтар ордук тарҕаналлар.

Маны тэҥэ түөкүттэр тиэрдэр сулууспа аатыттан суруктары ыытыахтарын сөп. Онно баһыылканы тиэрдэр кыаллыбата диэн, хаттаан төлүүргэр көрдөһөллөр эбит.

«Сыл бүтүөн иннинэ иэскин төлөө» эбэтэр «түргэнник айаннаабыккар ыстараапкын төлөө» диэн  сымыйа иһитиннэриилэр эмиэ кэлэллэр.

Ордук Саҥа дьыл иннигэр дьон кэлэн иһэр бырааһынньыгынан эҕэрдэлэһэр үгэстээхтэр. Түөкүттэр маны туһанан буортулаах файллары илдьэ сылдьар аккырыыккылары, анимацияны, видеоны ыыталыыллар. Бу аккырыыккалар куттала диэн туһанааччы тус бэйэтин дааннайдарын уорар бырагыраамалары илдьэ сылдьаллар. Олору көрөөрү бэйэтин эбэтэр анал сигэни баттаатыҥ да, түбэһэҕин.

“Файл аһылынна да, түөкүттэр баан сыһыарыыларыгар, паролларга, тус бэйэҥ туһунан информацияҕа киирэр кыахтаналлар. Ол түмүгэр биир да харчыта суох хаалыахха сөп”, — диэн эспиэр сэрэтэр.