Чэпчэки туурдартан сэрэниҥ

12 хонуктаах Саҥа дьыл бырааһынньыга чугаһаан, дьоҥҥо ханна эрэ күүлэйдии барар санаа кииртэлиир. Дьэ манна эмиэ түөкүттэр күрүчүөктэрин бэлэмнээн олороллор.

Ол курдук, турфирма үлэһитэ буолан, сынньалаҥы эрдэттэн чэпчэки сыанаҕа былаанныырга этии киллэрэллэн, “умайа турар” Саҥа дьыллааҕы туурдары атыылыы сатыыллар, сиэртибэлэрин тылларыгар киллэрдэхтэринэ бронньнаа диэн эрдэттэн төлөбүрү көрдөөбүтүнэн бараллар.

Бастакы төлөбүр ыытылынна да, түөкүттэр харчыҥ ааспата диэн хаттаан ыытарга көрдөһөллөр. Киһиэхэ харчытын төннөрбүттэрин туһунан бигэргэтиини ыыталлар уонна хаттаан ыытарын ситиһэллэр. Ол кэнниттэн «ааҕыныстыбаны» кытта сибээс бүтэр: төлөпүөн да эппиэттээбэт, үлэлии турбут да саайт тохтуур.

Онон эспиэрдэр турдары биллэр эпэрээтэрдэр уонна аккредитациялаах ааҕыныстыбалар официальнай саайтарын нөҥүө эрэ бронньнааҥ уонна төлөөҥ дииллэр. Аһара улахан чэпчэтиилэр, биирдиилээн киһи каартатыгар эрдэттэн төлөбүрү ыыттарыы эбэтэр төлөбүрү официальнайа суох төлөбүр систиэмэтинэн оҥорторуу – бу түөкүттэр классическай бэлиэлэрэ буолаллар.