Чэпчэтиилээх куортамҥа 361 кыбартыыра тутуллан киириэҕэ

2025 сылга Саха сиригэр  «Доступное арендное жилье в Дальневосточном федеральном округе» бырагырааманан 361 кыбартыыраны тутан киллэрэргэ былаанныыллар. Ол курдук, Дьокуускайга 141 кыбартыыралаах, Нерюнгригэ 192 кыбартыыралаах, Алдаҥҥа 28 кыбартыыралаах дьиэлэр тутуллан киириэхтэрэ. Бу туһунан улуустааҕы Тутуу министиэристибэтэ иһитиннэрдэ.

Бырагыраама олоххо киирэн эрэр: 2024 сыллаахха атырдьах ыйыгар Дьокуускайга бастакы 24 кыбартыыраны толору миэбэлинэн уонна бытовой тиэхиникэнэн хааччыйбыттар. Федеральнай киин уонна өрөспүүбүлүкэ бырабыыталыстыбатын өйөбүлүнэн, икки хостоох кыбартыыра ыйдааҕы куортамын төлөбүрэ 12 тыһыынча кэриҥэ солкуобайга тэҥнэһэр.

2026 сылга өссө 618 кыбартыыра үлэҕэ киирэрэ былааннанар: Дьокуускайга 283, Нерюнгрига 60, Алдаҥҥа 117, Мииринэйгэ 158. Уопсайа өрөспүүбүлүкэ үрдүнэн 1003 чэпчэтиилээх куортам кыбартыырата тутуллара былааннанар, ол иһигэр: Дьокуускайга 448, Нерюнгрига 252, Мирнэйгэ 158, Алдаҥҥа 145. Бары чэпчэтиилээх усулуобуйалаах куортамҥа эрэгийиэннээҕи операторга бэриллиэхтэрэ.

Санатан эттэххэ, бырагыраама 2022 сыллаахха ыытыллыбыт Илиҥҥи экономическай форум кэнниттэн Арассыыйа бэрэсидьиэнэ Владимир Путин сорудаҕынан саҕаламмыта. Бырагыраама сыала-соруга эдэр исписэлиистэри, устудьуоннары уонна ирдэбиллээх исписэлиистэри чэпчэтиилээх усулуобуйаҕа дьиэнэн хааччыйыы буолар.