Чэпчэтиилээх, субсидиялаах билиэттэри туһаныы

Киин куораттарга көтөр билиэт сыаната ыараханын бары билэбит. Онуоха чэпчэтиилээх билиэттэр, субсидиялар көмө буолаллар.

Бу маннык көмөнү туһанаҕын дуо? Хаһан, хайдах ылыахха сөбүй? Маннык билиэттэр икки көрүҥҥэ арахсаллар:

—— Чэпчэтиилээх — 12-22 саастаах оҕолор, ыччаттар, 55 саастарын ааспыт дьахталлар, 60 саастарын ааспыт эр дьон, элбэх оҕолоох төрөппүттэр (анал дастабырыанньалаах, эбэтэр, ыспыраапкалаах буолуохтаахтар), 1 группалаах инбэлииттэр уонна кинилэри арыаллыыр дьон, оҕо эрдэхтэриттэн инбэлииттэр уонна 18 сааһыгар диэри инбэлиит оҕону арыаллыыр дьон туһаналлар.

Чэпчэтиилээх билиэтинэн Дьокуускайтан Москваҕа, Владивостокка, Екатеринбурга, Минеральные Воды куоракка, Новосибирскайга, Омскайга, Санкт-Петербурга, Сочига барыахха-кэлиэххэ сөп. Нерюнгриттан — Москваҕа уонна Новосибирскайга,  Мииринэйтэн Москваҕа, Новосибирскайга, Санкт-Петербурга көтүөххэ сөп.  Чэпчэтиилээх билиэттэр  «Якутия», «Аэрофлот», S7 авиахампаанньалар атыылыыллар.

— Уһук Илин олохтоохторугар субсидиялаах билиэт — манна ким баҕарар хапсар, Уһук Илин эрэгийиэннэригэр бырапыыскалаах эрэ буолуоххун наада. Дьокуускайтан Санкт-Петербурга, Москваҕа, Нерюнгриттан — Москваҕа, Мииринэйтэн — Москваҕа барыахха-кэлиэххэ сөп. «Якутия», «Аэрофлот», S7 авиахампаанньалар атыылыыллар.

Маны тэҥэ, Арктика улуустарын олохтоохторо анал тарыыбынан көтүөхтэрин сөп — Баатаҕайга, Депутатскайга, Өлөөҥҥө, Орто Халымаҕа, Тиксиигэ, Черскэйгэ, Чокурдаахха, Зырянкаҕа, Сааскылаахха, Белай Гораҕа, Муомаҕа, Саккырыырга, Эдьигээҥҥэ «Якутия» уонна  «Полярные авиалинии» хампаанньаларынан. Бырапыыска ирдэнэр.

Биллэн турар, маннык билиэттэр түргэнник бүтэллэр. Сыл саҕаланыыта атыыга баар буолаллар. Уһук Илиҥҥи субсидиялаах билиэт бүтэн хаалбатын курдук, күн аайы 6 ый иннинээҕи күнү атыылыыллар. Холобур, олунньу 5 күнүгэр атырдьах ыйын 5 күнүнээҕи субсидиялаах билиэт атыыга тахсар. Билэр дьон манаан олорон, эрдэттэн ылан кэбиһэллэр.

Сыаната да араастаах буолар эбит. Холобур, атын каассаларга эбии хомуур төлөбүрү ылаллар, онон 11 тыһыынча солкуобай буолар дииллэр.

Оттон «Аэрофлот» саайтыгар 9200 солкуобайы көрдөрөр. Ол эрээри, «Аэрофлот» бронь ылан баран, 5 сууккаҕа диэри бырапыысканы бэрэбиэркэлиэн сөп. Тута атыылаһар кыаллыбат. Бу сылга номнуо иккитэ субсидиялаах билиэти ылбыт буоллаххына, аккаастыахтарын сөп. Бэрэбиэркэлээн баран, электроннай буостаҕа төлүүр сигэни ыыталлар. Сыаната оннунан хаалар.

Онон уоппускаҕытын эрдэттэн былааннаан, тускутугар туһаныҥ!