Чэппиэртэн саҕалаан сылыйар
![](https://sakha-sire.ru/wp-content/uploads/2023/10/kyhyn-900x596.jpg)
Бу нэдиэлэҕэ Саха сирин үгүс өттүгэр синоптиктар халлаан лаппа сымныа дииллэр.
Салгын температурата ортотунан 10 кыраадыс үрдүөҕэ. Сылыйыыны, хаары уонна күүстээх тыалы салгын маассата Охотскай уонна Беринговай байҕаллартан аҕалыа. Бу туһунан Гидрометсулууспа начаалынньыга Татьяна Маршалик иһитиннэрдэ.
«Олунньу 11 күнүгэр өрөспүүбүлүкэ хотугулуу-илиҥҥи өттүгэр Охотскай уонна Беринговай байҕаллартан кэлбит салгын маассатын сабыдыалыгар түбэстэ. Салгын температурата үрдүүр, хаар түһэр, дохсуннук тыалырыа. Өймөкөөн уонна Томпо оройуоннарыгар салгын температурата -50° кыраадыстаах бэлиэни аһарыа суоҕа. Ордук Арктика кытылларынан — Аллараа Халыма уонна Аллайыаха оройуоннарыгар салгын температурата биллэрдик үрдүө, онно күүстээх хаар түһэрэ күүтүллэр», — диэн кэпсээтэ Татьяна Маршалик. Синоптик бэлиэтээбитинэн, чэппиэртэн саҕалаан салгын маассата Саха сирин киин оройуоннарыгар уонна сорох сиринэн арҕаа оройуоннарыгар тарҕаныа.
«Бу нэдиэлэ бүтүөр диэри Саха сирин үгүс оройуоннарынан тымныы сымныырын күүтэбит. Ортотунан салгын температурата 10 кыраадыс үрдүүр, сорох оройуоннарынан өссө үрдүк. Бу күннэргэ киин оройуоннарынан маннык күн-дьыл туруоҕа: түүн -40, күнүс -30 кыраадыс тымныы. Оттон илин эҥээртэн сылаас салгын маассата кэллэҕинэ, күнүс салгын температурата күнүс -24…-30, түүн -29…-35 кыраадыс буолуо.
Маннык салгын температурата Саха сирин үгүс оройуоннарынан күүтүллэр, оттон былыттаах кэмигэр кыра уратылаах буолара сабаҕаланар. Урукку ыйдарга балачча нуорматтан сылаас күннэр турбуттарын үрдүнэн, олунньу бастакы күннэригэр Саха сиригэр салгын температурата нуорматтан намыһах этэ», — диэтэ Татьяна Маршалик.
Сообщить об опечатке
Текст, который будет отправлен нашим редакторам: