Чөркөөх түмэлигэр Алгыстаах монумент

 Бэс ыйыгар аһаҕас халлаан анныгар турар Чөркөөх түмэлигэр “Халлаан сырдыыра” диэн Таатта улууһун бастакы кулубатыгар, норуот ырыаһыта  И.Е.Кулаковскай-Оонньуулаах Уйбаан төрөөбүтэ 160 уонна саха суругунан уус уран литературата саҕаламмыта 125 сылыгар аналлаах үтүө тэрээһин ыытыллыбыта.

Тэрээһин биир үөрүүлээх түгэнинэн эдэр, кыайар-хотор, айар-тутар үлэ үгэнигэр сылдьар А.Е.Кулаковскай-Өксөкүлээх Өлөксөй мэҥэ өйдөбүнньүгэ туруоруллуута буолбута. Чөркөөх түмэлин сэбиэдиссэйэ Михаил Протодьяконов бу монумент силигэ ситтэҕинэ бүтүн композиция буолан тахсыахтааҕын, сахалыы иһиттээх Алгысчыт дьахтар оҥоһулла сылдьарын бэлиэтээн эппитэ. Монумент ааптара — биир дойдулаахпыт Иван Попов буолар.

Саха суругунан уус-уран литературатыгар халыҥ хаарга суол түһэрэн кэриэтэ  Өксөкүлээх Өлөксөй “Байанай алгыһынан” киирбитэ. “Айар тыл аҕата буолар” диэн Былатыан Ойуунускай суоруллубат гына суруйан турар. Онон төрөөбүт тылбыт уус-уран литературата алгыһынан саҕаламмыта. Монумент аата даҕаны – Алгыс диэн. Бу күннэргэ композиция Алгысчыт дьахтара уонна сиэрин-туомун иһиттэрэ Дьокуускай куораттан кэлэн олохтоох сиригэр үйэ-саас тухары туруорулуннулар.

Манна даҕатан суруйдахха, 2022 сыллаахха ыам ыйын 25 күнүгэр Ил Дархан А.С.Николаев ыйааҕар олоҕуран “2023 – 2027 сыллар А.Е.Кулаковскай-Өксөкүлээх Өлөксөй биэс сылларынан” биллэриллибитэ. Бу сылларга Өксөкүлээх Өлөксөй аатын үйэтитиигэ, үөрэтиигэ, сырдатыыга үгүс үлэ ыытыллыахтаах. Бу биир бэлиэ кэрэһэтинэн Чөркөөх түмэлигэр Өксөкүлээххэ анаммыт  үйэтитии бастакы олуга уурулунна. Монумент турар сирэ – Таатта үрэх үрдүгэр, саха олоҕун, тутууларын көрдөрөр Аал-луук мас аттыгар туруорулунна.

«Кини курдук алгыһын анаабыт,  хомоҕой, үрдүк суолталаах хоһооннору төрөөбүт норуотугар анаабыт суруйааччы суох. Бу монумент итэҕэлбитин, сиэрбитин-туоммутун кэнчээри ыччаппытыгар дириҥ өйдөбүллээх үйэлэргэ кэпсии, көрдөрө туруоҕа», — диэн Михаил Протодьяконов санаатын үллэһиннэ.

С.Халгаева.

Хаартыскаларга: Таатта үрэх үрдүгэр Алгыс монумент туруорулунна.