Чөркөөх түмэлигэр Дмитрий Кононович Сивцев — Суорун Омоллоон аата иҥэрилиннэ

Бүгүн, ыам ыйын 20 күнүгэр, СӨ Ил Дархана Айсен Николаев «Ем.Ярославскай аатынан хотугу норуоттар историяларын уонна култуураларын холбоһуктаах түмэлин»  филиалыгар — Чөркөөххө баар историко-мемориальнай түмэлгэ Дмитрий Кононович Сивцев — Суорун Омоллоон аатын иҥэрэр туһунан ыйаахха илии баттаата.

Санатан эттэххэ, Таатта улууһугар Чөркөөххө түмэл Дмитрий Кононович Сивцев — Суорун Омоллоон көҕүлээһининэн уонна уопсастыбаннас күүһүнэн тэриллибитэ. Түмэл 1977 сыллаахха сэтинньи 2 күнүгэр арыллыбыта.

Түмэл сиригэр-уотугар өрөспүүбүлүкэ араас муннугуттан үлэ кэлэктииптэрин күүһүнэн көһөрүллэн аҕалыллыбыт 20 араас тутуу баар. Сүрүн эбийиэктэриттэн биирдэстэринэн XX үйэ саҥатыгар олохтоох маастардар туппут Николаевскай таҥараларын дьиэтэ буолар.

Дмитрий Кононович Сивцев — Суорун Омоллоон (1906-2005) – суруйааччы, драматург, Социалистическай Үлэ Дьоруойа, Саха сирин норуодунай суруйааччыта, Тааттаҕа Чөркөөхтөөҕү историко-мемориальнай түмэли, Суоттуга «Доҕордоһуу» музей-заповеднигы төрүттээбитэ.

Сиһилии https://www.sakha.gov.ru/news/4857 көрүөххүтүн сөп.

СӨ Ил Дарханын уонна Бырабыыталыстыбатын пресс-сулууспата