Чөркөөххө Ойуунускай аатынан дыбарыас тутуллуо

Чөркөөх — бу былыр-былыргыттан саха интеллигенцията, бастакы үөрэхтээхтэрэ уутуйан үөскээбит сирдэрэ. Ол курдук, бастакы идэлээх быраас П.Сокольников, бастакы борохуот хапытаана Богатырев, бастакы фотограф, худуоһунньук, этнограф Иван Попов, Национальнай бибилэтиэкэ бастакы сэбиэдиссэйэ Тюнгюрядов, Социалистическай Үлэ Дьорурйа, норуодунай суруйааччы Суорун Омоллоон, Былатыан Ойуунускай, уо.д.а. төрөөбүттэрэ.

Бырабыыталыстыба отчуотугар олохтоохтор тоҕо анньан кэлбиттэр, элбэх ыйытыылары биэрдилэр. «Икки сыл иһигэр сирэй көрсөн кэпсэтэрбитин аҕынныбыт» дэһэллэр.

Манна сүрүннээн киин ититии ситимигэр холбонууну, култуура киинин тутууну туруорустулар. П.Ойуунускай аатынан култуура киинин уораҕайа Ил Дархан сорудаҕынан, суруйааччы 130 сылын көрсө быйыл тутуллуохтаах этэ, сыбаайалара түһэн тураллар. Бу курдук култуура кииннэрэ И.Барахов дойдутугар Үөһээ Бүлүү Харбалааҕар, М.Аммосов дойдутугар Нам Хатырыгар тутулунна уонна тутулла турар. Оттон Чөркөөххө тутар хампаанньа кыһалҕалары көрсөн, тутууну тохтотон кэбиспит.

Бу кыһалҕаны туоратарга улуус дьаһалтата, тутуу министиэристибэтэ уонна бырабыыталыстыба бииргэ үлэлииллэр. Улуус баһылыга Михаил Соров этэринэн, бу бэдэрээтчит ылбыт харчытын толуйуор диэри бу саас үлэтин ыытарын ситиспиттэр. Бу кэнниттэн куонкурус ыытыллан, саҥа бэдэрээтчит булан, эһиил тутуллан киириэҕэ диэн эрэннэрдилэр.

Маны тэҥэ, быһыты тутуу, өртөөһүнү көҥүллээһин, орто оскуола дьиэтэ тымныытын, хапытаалынай өрөмүөн ыытыллара наадатын, мусуой өрөмүөнүн, уот лиинийэтэ эргэрбитин, мөлтөҕүн, ыраас уу, о.д.а. боппуруостары туруордулар.

Манна бырабыыталыстыба бэрэссэдээтэлин солбуйааччы Сергей Местников маннык эттэ:

— Оскуолаҕа хапытаалынай өрөмүөн ыытыллыахтааҕар сөбүлэһэбит. Аныгы үйэҕэ оскуола 16 кыраадыс эрэ сылаас буолара сатаммат. Эспэртиисэҕэ бардаҕына, хапсар (кыахтаах). Манна элбэх этии киирдэ, ирэ-хоро кэпсэтии буолла.

Билигин грант элбэх. Бырайыак оҥорон, киирсэн иһиҥ. Түөлбэлэргэ туспа грант баар.
Оттон култуура киинин туһунан эттэххэ, эһиил хайаан да тутуллуо. Ойуунускай аатынан баараҕай дыбарыас тутуллуо диэн эрэннэрэбит, — диэтэ.