Чөркөөхтөр норуот тыйаатырдаахпытынан киэн туттабыт

Бу сыл сэтинньи 15 күнүгэр П.А. Ойуунускай аатынан Судаарыстыбаннас түмэлигэр «Норуот айар аартыга – ааспыт, билиҥҥи, кэлэр кэмнэргэ”… диэн ааттаах П.В. Толстяков аатынан Чөркөөхтөөҕү норуот тыйаатыра тэриллибитэ 35 сылыгар аналлаах быыстапка аһылынна.

Быыстапканы кырдьаҕас Чөркөөх норуотун тыйаатыра уонна түмэл үлэһиттэрэ сүбэлэрин холбоон оҥордулар. Биһиги нэһилиэкпитигэр норуот тыйаатыра тэриллиэҕиттэн элбэх испэктээкил туруоруллан көрөөччүлэр сэҥээрилэрин, болҕомтолорун  ылыан ылар. Сылтан сыл көлүөнэ артыыстар солбуйсаллар. Билигин норуот тыйаатырыгар 35 сыл анараа өттүгэр оонньообут дьон оҕолоро, сиэннэрэ ситиһиилээхтик кытталлар, этэргэ дылы, туйах хатарааччылардаахтар… Манна даҕатан бэлиэтээтэххэ, билигин норуот тыйаатырын режиссерунан Мотрена Яковлева, П.В. Толстяков төрөппүт кыыһа ситиһиилээхтик үлэлиир.

Быыстапкаҕа норуот тыйаатырын быыс кэннинээҕи үлэтэ-хамнаһа көрдөрүллэр: артыыстар кэтэн тахсан оонньуур таҥастара-саптара, араас кэмҥэ испэктээкилгэ угуйар биллэриилэр, кинигэлэр, хаартыскалар.

Бэлиэ түгэнинэн норуот тыйаатырын режиссера Мотрена Яковлева  кэлбит дьону эҕэрдэлээтэ, Судаарыстыбаннас түмэлин үлэһитэ Анна Борисова быыстапканы сырдатта, Н.Н. Тулааһынап аатынан норуот айымньытын уус-уран салайааччыта Анна Обоюкина иилээн-саҕалаан ыытта. Тэрээһин кэрэ киэргэллэринэн Чөркөөх орто оскуолатын 6-с кылааһын үөрэнээччилэрин үҥкүүлэрэ буолла (салайааччы Лия Семенова).

Улуу Алампа сүүс сыл анараа өттүгэр эппиттээх: “Тыйаатыр киһи хараҕынан көрбөт олох-дьаһах кистэлэҥин көрдөрөн үөрэтэр, өйү-санааны кэҥэтэр, дириҥэтэр, киһи күннээҕи эрэйин-буруйун умуннаран, сүрэҕин-быарын сымнатар, киһи үчүгэй санаатын уһугуннарар сайыннарар оскуола, — диэн.

С.Халгаева.