Чочуга үлэ бэтэрээннэрин миин үс көрүҥүнэн күндүлээтилэр

Быйылгы сыл Бүлүү улууһун Чочу нэһилиэгэр Үлэ сылынан биллэриллибитэ.

Бу күннэргэ сыл аайы ыытыллар тэрээһини саҥалыы тыыннаан, олохтоох дьаһалта сопхуос саҕанааҕы үлэһиттэри, билигин бочуоттаах сынньалаҥҥа олорор үлэ бэтэрээннэрин түмэн, » Сайыны көрсүү» дьоро бырааһынньыгын тэрийдэ.

— Нэһилиэкпит булчуттара бу күҥҥэ анаан сааскы бастакы куһу, сибиэһэй балыгы бэрсэн, дьоммутун минньигэс миининэн күндүлээн үөртүбүт. 

Кусчут уонна балыксыт дьоммутугар, түгэнинэн туһанан, истиҥ махталбытын тиэрдэбит. 

Дьоммутугар миин үс көрүҥүн (буотарах, кус, балык) амсаттыыбыт! 

И.М.Гоголев -Кындыл түмэлин үлэһиттэрэ араас остуол оонньуутун оонньотон, дьоммут араас бириистэргэ тиксэн, бэтэрээннэр бары илии тутуурдаах бардылар.

Далбар хотуттарга кулууп кэлэктиибэ оҕуруот аһын арассаадатын бэлэх уунна.

Чочуттан уонна Кыадаҥдаттан 40-ча бэтэрээн кэлэн сынньанан, үөрэн-көтөн бардылар, — диэн санаатын үллэһиннэ нэһилиэк баһылыга Петр Догоюсов.

Үлэ сылыгар дойдуларын туһугар сыраларын биэрэн туран үлэлээбит дьоҥҥо тустаах болҕомто баара үчүгэй.

Хаартыскалары олохтоох дьаһалта баһылыга Петр Догоюсов тиксэрдэ.