Чочуллубут ураты талаан

Олунньу  3 күнүгэр биир дойдулаахпыт, СӨ үтүөлээх артыыската, дьоҥҥо-сэргэҕэ тыйаатыр уонна киинэ артыыһын быһыытынан киэҥник биллибит, П.А.Ойуунускай аатынан Саха академическай тыйаатырын артыыһа Маргарита Михайловна Борисова олоҕун биир сырдык күнүн бэлиэтиир үбүлүөйдээх күнэ.

Маргарита Михайловна ойор күннээх оҕо сааһа Ньурба оройуонун Дьикимдэ сэлиэнньэтигэр ааһан, манна аҕыс кылааһы бүтэрэн, салгыы Ньурба орто оскуолатыгар үөрэнэн, оҕо сааһыттан ыра гыммыт баҕа санаатын толорон, Уһук Илиннээҕи ускуустуба институтын дыраама уонна киинэ артыыһын идэтигэр үөрэммитэ.

Ускуустуба икки көрүҥэ: тыйаатыр уонна киинэ   СӨ үтүөлээх артыыската, Арассыыйа уонна Саха сирин Киноматографистарын сойууһун чилиэнэ Маргарита Борисова айар олоҕун дьылҕатыгар үтүө эрэ өттүнэн дьайбыта. Ол курдук, 1983 сыллаахха Арассыыйа экраныгар саха артыыскаларыттан биир бастакынан суолу аһан, Свердловскайдааҕы киинэ устуудьуйатыгар режиссер Николай Гусарев “Семен Дежнев” киинэтигэр  Абакаяда оруолун толорбут Маргарита Борисова көрөөччү биһирэбилин уонна тапталын ылбыта, салгыы  атын киинэлэргэ уһуллар кыаҕы биэрбитэ.
Артыыска Маргарита Борисова Саха академическай тыйаатырыгар 30-н тахса араас  туруорууга сүрүн оруоллары итэҕэтиилээхтик оонньообут, олус кыраһыабай, кылыһахтаах куоластаах артыысканы көрөөччү мэлдьи үөрэ көрсөр. Тыйаатыр сыанатыгар олоҕор ылбыт идэтинэн талаана арыллан, элбэх сүгүрүйээччилэрдээх, чаҕылхай артыыска быһыытынан уһун кэмҥэ оонньоон кэллэ.

2016 сыллаахха Арассыыйаҕа Киинэ сылыгар СӨ Суруйааччыларын сойууһун чилиэнэ, СӨ үтүөлээх суруналыыһа, Саха тыйаатырын эйгэтин өрүү сырдатар   Надежда Егорова-Намылы Маргарита Борисова олоҕун,  айар үлэтин туһунан кэпсиир “Ыра санаа ыллыгынан” диэн кинигэтэ ааҕааччы киэҥ эйгэтигэр тарҕаммыта. Икки айар куттаахтар сүбэлэрин холбоон, бииргэ үлэлээбиттэрин түмүгэр саха аныгы литературатыгар сонун сүүрээн дьикти айымньы буолан тахсыбыта.
2023 сыллаахха төрөөбүт дойдутун Дьикимдэ дьоно- сэргэтэ, нэһилиэккэ айымньылаахтык үлэлиир култуура тэрилтэтэ, олохтоох бибилэтиэкэ үлэһитэ СӨ култууратын үтүөлээх үлэһитэ Светлана Никандровна Павлова сүбэлэрин холбоон, биир дойдулаах, артыыс быһыытынан киэҥ үрдэлгэ тахсыбыт кыыстарын, Маргарита Борисова аатын «Утум» норуот айымньытын киинигэр  иҥэрэр,   үгүс дьон өйүгэр санаатыгар билигин да сырдык өйдөбүл буолан сылдьар улахан тэрээһини оҥорбуттара.

Ол курдук, «Абакайаада аартыгынан» тыйаатыр бэстибээлэ, Дьикимдэ айар талааннаахтара артыыска оонньообут оруолларынан хартыына галереята,  айар аартыгар кынаттаабыт Абакаяда оруолунан искибиэр
аһыллыыта. Бу барыта төрөөбүт, улааппыт дойдутун дьоно кыыстарын талааныгар сүгүрүйэн, улахан тапталларын биллэрэн, дьон-сэргэ көрүүтүгэр таһаарбыттара, тустаах киһиэхэ Маргарита Михайловнаҕа хайдахтаах үөрүүнү бэлэхтээбитин,  сэрэйиэххэ эрэ сөп, этэргэ дылы/ дьол диэннэрэ бу буоллаҕа.

Суруйуубун артыыска эдэр дьоҥҥо туһаайан:
«Талаан киһи тус бэйэтин эрэ өҥөтө буолбатах. Үөһэттэн бэриллибит талааны таба туһаныахха, сатаан кырыылыахха, күлүмүрдүү сылдьар күндү тааска кубулутуохха наада…», -– диэн эппит тылларынан түмүктээн туран, биир дойдулаахпыт, СӨ үтүөлээх артыыската, Ньурба оройуонун Дьикимдэ нэһилиэгин Бочуоттаах олохтооҕо  Маргарита Борисованы олоҕун биир сырдык кэрдиис кэминэн эҕэрдэлээн, Күөх Ньурбаттан куорсун анньынан, норуот тапталлаах артыыската буола үүммүт үтүө аатыҥ ааттана турарыгар, чөл-чэгиэн туругу, мэлдьи дьолунан сандаара,  айар үлэҥ аартыгар сонун ситиһиилэр кэлэ турдуннар диэн, дойдуҥ дьонун аатыттан баҕа санаабытын тиэрдэбит.

Мария НИКОЛАЕВА, «Ньурба» хаһыат уопсастыбаннай кэрэспэдьиэнэ