Чокуурдаахха Айсен Николаев байыаннай сулууспалаах дьиэ кэргэнигэр сырытта

Ил Дархан Айсен Николаев Чокуурдаахха оробуочай сырыытын кэмигэр байыаннай сулууспалаах Алексей Березкин дьиэ кэргэнигэр сырытта. Бу туһунан Ил Дархан телеграмм-ханаалыгар иһитиннэрдэ.

«Алексей ийэтэ Лидия Ильинична уолун туһунан киэн туттунуулаахтык кэпсээтэ. Кини элбэх мэтээллээх бойобуой дьайыы бэтэрээнэ, Чокуурдаах бөһүөлэктээҕи сэбиэтин депутата, олохтоох хотугу аҕыйах ахсааннаах норуоттар ассоциацияларын уонна бойобуой дьайыыга сылдьыбыт бэтэрээннэр ассоциацияларын чилиэнэ. Үлэҕэ-хамнаска, уопсастыбаннай олоххо көхтөөх киһи. Байыаннай дьайыы саҕаламмытын кэнниттэн Алексей төрөөбүт дойдутун көмүскүү барбыта», — диэн Айсен Николаев суруйда.

Ил Дархан бэлиэтээбитинэн, Алексей дьиэ кэргэнигэр дойду, өрөспүүбүлүкэ өттүттэн бары көмө оҥоһуллар.