Чокуурдаахха сыл бүтүүтэ саҥа оскуола үлэҕэ киириэҕэ

Чокуурдаахха оскуола тутуута 2014 сыллаахха саҕаламмыта. Онтон бэдэрээтчиттэр моҥкурууттаабыттарын кэннэ, тутуу тохтуу сылдьыбыта. 2020 сыллаахха оскуола тутуутун сөргүппүттэрэ. Айсен Николаев Чокуурдаахха бара сылдьан, оскуола тутуутун быйылгы үөрэх дьылын 2-с чиэппэригэр бүтэриэхтээххит диэн сорук туруорда.

Аллайыаха оройуонугар оробуочай сырыытыгар Ил Дархан үлэ хайдах баран иһэрин билистэ. Бүгүҥҥү күҥҥэ тутуу 60% бүтэн турар.

— Быйылгы биир сүрүн эбийиэкпитинэн Чокуурдаахха 275 миэстэлээх оскуоланы тутан киллэрии буолар. Бу хас да сылы быһа тутуллубакка, тохтоон турбут эбийиэк буолар. Ол эрээри, тутуу сөргүтүлүннэ, сыл бүтүөр диэри тутуллуон сөп. Арктика тыйыс сиригэр-уотугар оҕолорго үчүгэй усулуобуйаны тэрийиэхтээхпит. Бу кэтэһиилээх эбийиэк тутулларын туһугар, биһиги барытын оҥоруохпут, — диэн кини эттэ.

2 этээстээх оскуола иэнэ – 5 тыһыынча кв.миэтэрэ. Манна аныгы ирдэбиллэргэ эппиэттиир споривнай саала, анал тэрилинэн хааччыллыбыт кэбиниэттэр, о.д.а. бааллар. Билигин тутууга 30 киһи үлэлии сылдьар. Инженернэй ситимнэри, вентиляцияны тардыы, истиэнэни, муостаны халыҥатыы, о.д.а. үлэлэр ыытыллаллар.

Бүгүҥҥү күҥҥэ А.Чикачев аатынан Чокуурдаах орто оскуолатын үрдүкү кылаастарын үөрэнээччилэрэ эргэ, саахалланар туруктаах  мас дьиэҕэ үөрэнэ сылдьаллар. Спортивнай дьарыктар бөһүөлэк саалатыгар ыытыллаллар. Алын сүһүөх кылаастар 60-с сылларга тутуллубут таас дьиэҕэ үөрэнэллэр. Манна эмиэ хапытаалынай өрөмүөн оҥоһуллара ирдэнэр.

Ил Дархан, бырабыыталыстыба дьаһалтатын пресс-сулууспата.