Чокуур Гаврильев: «Аан дойду олоҕо оҥоһуллар»

Политолог, «Саха медиа» РИИХ генеральнай дириэктэрин солбуйааччы Чокуур Гаврильев «Байыаннай эпэрээссийэҕэ аан дойду олоҕо оҥоһуллар диэтэхпинэ, наһаа сыыспатым буолуо» диэн Украина уонна Арассыыйа икки ардыларыгар үөскээбит тыҥааһыннаах быһыы-майгы тула санаатын хаһыат саайтын ааҕааччыларыгар кылгастык үллэһиннэ.
— Украинаҕа буола турар киирсии былырыын эрэ саҕаламматаҕа. Ити утары турсуу төрдө-төбөтө арҕаа дойдулар Арассыыйа интэриэһин, киниэхэ куттал суох буолуутун учуоттаабатахтарыгар, ыаллыы, бырааттыы дойдубутун байыаннай сойууска ылаары ыксаппыттарыгар сытар.
НАТО Атлантиканан эрэ муҥурдаммакка, аны аан дойдуга дураһыйда. Ити барыта урукку укулааты оннунан хааллара сатааччы АХШ сабыдыалынан буолар. Кытай салайааччыта Си Цзиньпин Путиҥҥа: “100 сылга буолбатах улахан уларыйыылар буола тураллар. Ону биһиги хамсатабыт”, — диэбитэ эмиэ итини туоһулуур. Ол аата, биир өттүгэр — үүнэр-сайдар кыахтаах, бэйэ интэриэһин туруорсар санаалаах Арассыыйа уонна Кытай. Иккис өттүгэр — экэниэмикэҕэ бас-көс буолбут дуолларга сигэнэн, салгыы байар, төбөтүн көтөхпүтү үлтү сынньар баҕалаах Арҕааҥҥы блок.
Устуоруйа хаамыыта, спираль курдук, эргийэр дииллэринии, мин санаабар, Илин уонна Арҕаа утарсыыта хос эргийдэ. Соҕуруу Америка, Африка, Чугас Илин дойдулара ким диэки буолалларыттан, Украинаҕа киирсии түмүгүттэн олохпут укулаата түстэнииһи. Байыаннай эпэрээссийэҕэ аан дойду олоҕо оҥоһуллар диэтэхпинэ, наһаа сыыспатым буолуо.