Г.Филина ыытта
Бүгүн – Социальнай үлэһит күнэ. Чокуурдаахха күннэтэ бөһүөлэк устун төттөрү-таары биир уһун уҥуохтаах, нууччалыы хааннаах дьахтар тиэстэр. “Ээ, Филина Галя эбит, кырдьаҕастарыгар бардаҕа”, — диэхтэрэ кини түргэн хаамыытын көрөн биир дойдулаахтара.
Галина Филина СӨ Үлэҕэ уонна социальнай сайдыыга министиэристибэтин Аллайыаха улууһунааҕы управлениетын социальнай үлэһитэ. Кини бу үлэҕэ үлэлээбитэ күһүн 22 сылын туолуоҕа. 22 сыл устата кыаммат кырдьаҕастары көрүөх диэтэххэ туспа түбүк, эппиэтинэс.
— Бэйэм Абыйтан төрүттээхпин, бэтэринээр идэлээхпин.”Аллайыаха” сопхуоска бэтэринээрдээбитим. Социальнайга 1996 сылтан үлэбин саҕалаабытым. Онтон кыратык тохтуу сылдьан баран, бу күн бүгүнүгэр диэри үлэлиибин. Социальнай үлэһитинэн ис дууһатыттан кырдьаҕастарга амарах сыһыаннаах киһи үлэлиэхтээх дии саныыбын. Ылынныҥ даҕаны эппиэтинэстээхтик үлэлиэххэ наада. Биһиги бөһүөлэккэ төрдүөбүт. Бары 7-8 киһини көрөбүт. Тэрилтэбит салайааччыта Валентина Сергеевна Портнягина уонна социальнай үлэһиттэри салайар Александра Бердникова биһиги үлэбитин сүрүннүүллэр. Кырдьаҕастарбыт биһиги кэлэрбитин кэтэһэллэр аҕай. Кинилэр үөрэр-көтөр буоллахтарына, ол аата киһи сирбэт үлэһитэ эбиппин дии саныыгын, — диир Галина Григорьевна.
Галина Григорьевна сарсыарда 9 чаастан киэһэ 7 чааска диэри кырдьаҕастарым туһа диэн төттөрү-таары сүүрэр, бородуукта таһар, дьиэлэрин-уоттарын сууйар, аһатар, араас кыһалҕаларын быһаарсар. Көрөр дьонугар куруук улуус хаһыатын ааҕан биэрэр, сорохторго хаһыаттарын түҥэтэр.
Кинини үлэһит, сүрэхтээх, үтүө санаалаах гына ииппиттэригэр бэйэтин төрөппүттэригэр махтанар. Ийэтэ , тыа хаһаайыстыбатын үтүөлээх үлэһитэ, түөрт уордьаннаах Елена Андриановна, аҕата Григорий Кузьмич Банщиковтар оҕолорун барыларын маннык ииппиттэр. Онон хайа да үлэҕэ сирдэрбэт дьон.
Социальнай үлэһит Галина Филина сэттэ киһини көрөрүттэн иккитэ 1 группалаах инбэлиит. Быйыл Улуу Кыайыы 80 сылын көрсөр тэрээһиҥҥэ Биэнсийэ управлениетын уонна Бэтэрээннэр сэбиэттэрин көмөлөрүнэн сорох сылдьар кыахтаах дьонун бырааһынньыкка илпит. “Кыайыы Знамятын” көрсүүгэ эмиэ сылдьыбыттар. Онон кырдьаҕастара үөрүү бөҕө үһүлэр.
Бу курдук социальнай сулууспа туйгуна, үлэ бэтэрээнэ Галина Филина кырдьаҕастары көрөн-истэн, олохторун уһатар туһугар туруулаһар, бэриниилээх үлэтинэн холобур буолар.
— Биир идэлээхтэрбин Социальнай үлэһит күнүнэн эҕэрдэлиибин! Бары үтүөнү баҕарабын, — диэтэ кини түмүккэ.
“Талааннаах киһи барытыгар талааннаах” диэн этии оруннааҕын үгүс түгэҥҥэ көрө-истэ сылдьабыт. Былырыыҥҥы “Үрдэл” ырыа бириэмийэтигэр…
Олунньу 1 күнүгэр Арчы дьиэтигэр өрөбүллээҕи Оһуокайбыт үрдүк таһымнаахтык ааста. Куоракка олорор уус алданнар тоҕуоруһан…
“Успуорт сарыыссатынан” ааттанар чэпчэки атлетика аата эрэ “Чэпчэки атлетика”. Дьиҥинэн, успуорт көрүҥнэриттэн биир уустуктара. Ким…
Билиҥҥи кэмҥэ волонтердар көмөлөрө олус улахан суолталаах. Тыһыынчанан волонтердар түмсэн байыаннай дьайыы кыттыылаахтарын өйүүллэр. Бүгүн…
Бу күннэргэ Дьокуускайга бэйэ дьыалатын социальнай хантараак нөҥүө тэриммит дьоҥҥо олус туһалаах тэрээһин буолан ааста.…
Сунтаарга бу өрөбүл күннэргэ хапсаҕайы таптааччыларга улахан үөрүү. Сыллата ыытыллар Бордоҥтон төрүттээх хапсаҕайга спорт маастара…