Чокуурдаахха кыһыҥҥы суолу баттаһа тутуу матырыйааллара тиийдилэр

Дойду Бэрэсидьиэнэ Владимир Путин биллэрбит хаарбах дьиэттэн дьону көһөрүү бырагырааматынан Саха сиригэр элбэх үлэ-хамнас ыытыллар. Ол курдук, Аллайыаха улууһун Чокуурдаах бөһүөлэгэр саҥа дьиэлэр тутуллуохтара.

“КСК Лидер” ХЭТ (генеральнай дириэктэр Д.М.Гаврильев) бу бөһүөлэккэ ити дьиэлэри тутуохтаах. Онон кыһыҥҥы суолу баттаһа тутуу матырыйаалын тиэрдиини тэрийдэ. Ол курдук. былааннаммыт 50 массыына барыта итиччэ ыраах тиийдэ.

— Кыһыҥҥы суолу баттаһан матырыйаал тиийдэ. Уу суола аһылыннаҕына дьиэ ис бараанын оҥорууга наадалаах матырыйаал барыаҕа. Тутууну хаар уулуннаҕына, ыам ыйын ортотуттан саҕалыахпыт. Күн-дьыл хайдах буоларыттан тутулуктаах”, — диэтэ бу тэрилтэ тутууга инженерэ Семен Петров.