Чокуурдаахха күүстээх субуотунньук

Бэҕэһээ Аллайыаха улууһун Чокуурдаах бөһүөлэгэр Индигиир эбэ кытылын таһынан субуотунньук буолан ааста.

Манна “Кыталык” национальнай паарка, Аллайыахатааҕы Экологияны судаарыстыбанан кэтээн көрүүгэ иниспиэксийэтин үлэһиттэрэ кытыннылар. Кинилэргэ “Друзья природы –2025” экологическай десанын оҕолоро көмөлөстүлэр, көх-нэм буоллулар. Таһырдьа субуотунньуктуурга халлаан да туран биэрдэ.

Ол түмүгэр Советскай уулусса 8 нүөмэрин таһынааҕы тиэргэнтэн 7 куб бөҕү-сыыһы хомуйдулар. “СӨ ОДьКХ “ГУП Аллайыахатааҕы филиала тиэйэргэ тэлиэгэ биэрэн көмөлөспүт. Бу курдук, аллайыахалар тулалыыр эйгэлэрэ ыраас буоларын туһугар кыралыын-улаханныын кыһаналлар.

Хаартыскалар:  Аллайыахатааҕы Экологияны судаарыстыбанан кэтээн көрүүгэ иниспиэксийэтэ