Чокуурдаахха – Шарабориннар быыстапкалара

Ыраах хоту дойду олохтоохторо кэрэни кэрэхсииллэр. Бэҕэһээ Аллайыаха улууһун Чокуурдаах бөһүөлэгэр “Оҕо искусствотын оскуолатын” художественнай отделениетын преподавателлэрэ, кэргэннии Любовь уонна Александр Шарабориннар “Грани мастерства” диэн айар биэчэрдэрэ-быыстапкалара бэрт сэргэхтик буолла.

Биэс оҕолоох Шарабориннар олохтоох оҕолору кэрэни кэрэхсииргэ  үөрэтэллэр, талааннарын арыйарга көмөлөһөллөр. Любовь Аллайыаха кэрэ, ураты айылҕатын ойуулуур буоллаҕына, кэргэнэ Александр дьон мэтириэттэрин олус итэҕэтиилээхтик уруһуйдуурун биэчэргэ кэлбит дьон биһирээн көрбүттэр.

“Грани мастерства”  биэчэри Аллайыаха култууратын биллэр сайыннарааччыта Максим Дуткин салайан ыытта. Бу дьоро күннэринэн худуоһунньуктары Аллайыаха улууһун баһылыгын эбээһинэһин быстах кэмҥэ толорооччу Луиза Лебедева, “Оҕо искусствотын оскуолатын” кэлэктиибэ, Биэнсийэлээхтэр сэбиэттэрэ, айар кэлэктииптэр уо.д.а. истиҥник эҕэрдэлээтилэр. Кинилэр айымньылаах үлэлэригэр ситиһиилэри баҕардылар.