«Чолбон» сурунаал атырдьах ыйынааҕы нүөмэрэ

«Чолбон» сурунаал атырдьах ыйынааҕы нүөмэригэр «Улуу Кыайыы айымньылара» рубрикаҕа саха аныгы литературатыгар «Ийэм кэпсиир» диэн дьоһун романынан чаҕылхайдык суол тэлэн киирбит Сэмэн Маисов ити романыттан Аҕа дойдуну көмүскүүр Улуу сэрии сылларыгар төгүрүк тулаайах хаалбыт кыыс ыарахан дьылҕатын туһунан быһа тардыыны ааҕыаххыт.

Сурунаал атырдьах ыйынааҕы нүөмэрэ сылын ахсын үгэс курдук эдэр ааптардарга ананар. Быйылгы нүөмэргэ «Эдэрдэр куоластара: проза» рубрикаҕа эдэр ааптар Федор Павлов «Абааһы уола» диэн босхо бастаах бороҥ урааҥхайдар сирдэригэр аан бастаан нууччалар кэлиилэрин туһунан кэпсээнэ бэчээттэннэ. Кэпсээни ааҕан саҕалаатыгыт даҕаны тиһэҕэр тиийэ тартаран ааҕыаххыт.
Оттон «Эдэрдэр куоластара: поэзия» рубрикаҕа Дьааҥыттан Константин Каженкин-Архаан «Сүүс былыт быыһыттан эйэ күнүн көрдүү…», Хаҥаластан Гаврил Адамов «Дьиэ. Үлэ. Өрөбүл. Түмүгэ суох эргиир…», Чурапчыга төрөөбүт, Нам Үөдэйигэр улааппыт, 2022 сылтан анал байыаннай дьайыыга ыҥырыллан сулууспалыы сылдьар Степан Софронов-Үс Түүн уолун «Эрэллээх окуопабар…» диэн хоһооннорун хомуурунньуктара бэчээттэннэ.
«Архыай. Улуу тойук номоҕо» диэн былыргы грек үһүйээнигэр олоҕуран суруллубут буффонада-олоҥхо (буффонада диэн Италия тылынан көр-нар, дьээбэ-хообо диэн суолталаах эбит) «Эдэрдэр куоластара: драма» рубрикаҕа бэчээттэннэ. Ааптара поэт, драматург, киинэ сценарийын суруйар, Нам улууһун Бөтүҥ нэһилиэгиттэн төрүттээх Ангелла Попова-Кыраман.
Тылбаас салаатыгар Башкоркостон өрөспүүбүлүкэтин эдэр, биллиилээх суруйааччыта Айгиз Байбухаметов «Көтөр буолан эргиллиэм…» диэн сэһэнин түмүгэ бэчээттэннэ. Киһи бу сэһэни ыал буолбут эдэр дьон бары ааҕара буоллар диэн баҕара саныыр. Оччоҕо дьон тыыннаахтар тулаайахтара диир оҕолоро аҕыйыа этэ диэн тоҕо эрэ эрэнэ саныыгын.
«Киргэмбиспин — ол аата хайа тэллэҕин олохтооҕобун» диэн Ульяна Захарова Кэбээйи улууһун Сиэгэн Күөл нэһилиэгиттэн төрүттээх, төрөөбүт тылынан суруйар эбээн эдэр поэта Михаил Кривошапкин-Киргэмбистиин сэһэргэһиитин сурунаал ааҕааччылара хайаан даҕаны сэҥээрэн ааҕыахтара.
«Сир түннүгэ» рубрикаҕа Станислав Афанасьев 1911-1917 сылларга Дьокуускай куоракка үөрэнэр саха ыччаттарын куруһуогар сылдьар дьон түспүт хаартыскаларыгар хантан хааннаах, кимтэн кииннээх дьон мөссүөннэрэ үйэтитиллибитин биир-биир ырытан, быһааран суруйбут ыстатыйата таҕыста. Бу хаартыскаҕа баар дьон саха омук кэскилин түстээбит, үөрэх, наука, норуот хаһаайыстыбата сайдыытыгар улахан өҥөлөөх, оттон сорохторо күөгэйэр күннэригэр олус таһаарыылаахтык үлэлии сылдьан репрессия суорунатыгар мэлиллибит, сымыйа буруйдааһынынан ытыллыбыт дьоннор.
«Василий Рожин. Буойун-поэт сүгэн кэлбит күннэрэ» диэн Мария Андреева суруйуутугар анал байыаннай дьайыыга хорсуннук кыргыспыт, үрүҥ тыынын толук уурбут лирик-поэт кылгас эрээри чаҕылхай олоҕун билиһиннэрэр.
Оттон кириитикэ салаатыгар ааспыт сылга Россия Суруйааччыларын сойууһун чилиэнэ буолбут Валерий Андросов «Байанайдыын көрсүһүү» диэн кинигэтин Ольга Макарова ырытыыта таҕыста. Валерий Андросов булт тиэмэтигэр суруйуулара өбүгэлэрбит үйэлэри уҥуордаан кэлбит, кутуҥ- сүрүҥ түгэҕэр саспыт, умуллан эрэр сиэрдэрин-туомнарын, үгэстэрин уһугуннарар, кыым саҕан күөдьүтэр туох эрэ ураты тыыннаахтар.
Сурунаал «Оҕоҕун кытары аах» диэн рубриканан түмүктэнэр. Онно Семен Данилов «Чыычаах», «Көтөр оҕолоро» диэн оҕолорго аналлаах хомоҕой тыллаах хоһоонноро бэчээттэннилэр.