«Чолбон» сурунаал бастыҥнары бэлиэтээтэ

Быйыл »Чолбон» литература сурунаала төрүттэммитэ 100 сылын туолар. Бэлиэ түгэни көрсө элбэх тэрээһиннэр былааннаналлар. Олунньу 12 күнүгэр »Чолбон» сурунаал 2025 сылы түмүктүүр дьоро түһүлгэтэ тэрилиннэ.

Айсен Кысылбаиков кырыымпаҕа доҕуһуолунан Ырыа Саарын »Үрүҥ туллук эрэ мөлбөстүүр» ырыатынан түһүлгэни арыйбыта мээнэҕэ буолбатах. »Чолбон» сурунаалы төрүттээбит  бастакы эрэдээктэрэ  Алампа этэ.
2020 сылтан айар ааптардарын көҕүлүүр сыалтан, сурунаал бастакы эрэдээктэрэ Алампа аатынан бириэмийэни олохтообута. Бу сыллар тухары элбэх суруйааччы, кириитик, публицист бириэмийэ  лауреатын аатын ылбыттара.
Гаврил Андросов, сурунаал бас эрэдээктэрэ:
— »Чолбон» бириэмийэтэ дьоҥҥо-сэргэҕэ, айар эйгэҕэ киэҥник биллэр-көстөр буолла, өрөспүүбүлүкэҕэ литература эйгэтигэр саамай улахан бириистээх пуондалаах. Биһиги айар үлэни көҕүлүүр элбэх тэрээһиннэри, куонкурустары ыытабыт. Бу ааспыт сылга үлэлэппит »Чолбон» айар бырайыага» саҥа бырайыакпыт өссө кэҥиэҕэ.
Николай Потапов, СӨ инновацияҕа, сыыппаралаах сайдыыга уонна инфокоммуникационнай ньымаларга миниистирин солбуйааччы:
— 100 сыллаах кэрдиис кэми туораабыккытынан эҕэрдэлиибин! Айар үлэни үрдүк таһымҥа тутан илдьэ сылдьаргыт хайҕаллаах. Мантан ыла граннары кытта үлэҕэ түһүнүөхпүт. Эрэдээксийэни кытта ыкса үлэлэһиэхпит дии саныыбын.
Ньургуйаана Стручкова, »Сахабэчээт» тэрилтэ генеральнай дириэктэрэ:
— Бу биһиги 100 сылбытын саҕалыыр аан тэрээһиммит буолар. Номнуо бэһис сылбытын бириэмийэни туттарабыт, бастыҥнары чиэстиибит. »Чолбон» саха литературатын  көхтөөх тэрийээччитэ, көҕүлээччитэ аатын үйэ тухары чиэстээхтик илдьэ кэллэ. Саха тылын сүмэтэ, илбиһэ суруйааччылар айымньыларын нөҥүө саха дьонугар тиийэр, иҥэр, сайыннарар. Онон бириэмийэбитин үбүнэн өйүүр дьоҥҥо ис сүрэхпититтэн махтанабын! Быйыл Горнай улууһа биир дойдулаахтара Петр Аввакумов аатынан прозаҕа бириэмийэни анаатылар. Бу курдук куруук өйүүр дьонноох буолан, саха тыла, литературата сайда, чэчирии турдун!

Салгыы »Чолбон» айар кыһата» бырайыак кыттааччыларыгар туоһу суруктары туттардылар.
Режиссер Александр Лукин литература киинэ төрүтэ буоларын бэлиэтээн туран, киинэни устарга үөрэнэр устудьуоннар кыттыгас бырайыакка хайдах үлэлии сылдьалларын кэпсээтэ. Оҕолор суруйааччылар айымньыларынан дипломнай үлэ оҥорон, киинэ устан таһаарыахтара.
Саха уус-уран литературатыгар кириитикэ историятын чинчийээччи, кириитик Василий Протодьяконов кэриэһигэр уус-уран литература кириитикэтигэр сабыылаах күрэс бириистэрин туттара кыыһа Айталина Васильевна, Таатта Чөркөөҕүттэн аймахтара Никита Протодьяконов, Александра Вырдылина кэлэн, эрэдээксийэ үлэһиттэригэр махталларын тиэртилэр.
Бу сабыылаах күрэскэ 3 миэстэни Намтан Матрена Новгородова, 2 миэстэни Томпоттон Светлана Винокурова, 1 миэстэни Өрөспүүбүлүкэтээҕи лиссиэй учуутала Инара Федорова ыллылар.
Быйыл А.И. Софронов аатынан Бастакы эрэдээктэр бириэмийэтин поэзияҕа лауреатынан Елизавета Мигалкина буолла, »Саҥа саҕалааччы» ааты Федор Павлов, »Бастыҥ партнер» ааты »Саха» НКИХ, »Бастыҥ айар түмсүү» ааты — »Чурапчы» айар түмсүү ыллылар.
Документалист суруйааччы Дмитрий Гаврильев аатынан Саха сирин историятын сырдатыыга бириэмийэни Национальнай архыып дириэктэрин солбуйааччы Наталья Степанова »Саха тойотторо ыраахтааҕыга бастакы сырыылара» ыстатыйатын иһин тутта.
Петр Аввакумов аатынан прозаҕа бириэмийэни Горнай улууһун баһылыга Никита Андреев суруйааччы Анна Варламоваҕа-Айысхаанаҕа »Туундара туллуктара» сэһэнин иһин туттарда.
»Чолбон» сурунаал үлэтигэр көмөлөспүт дьоҥҥо Махтал суруктары, сибэкки дьөрбөлөрүн туттардылар.