Чугас аймаҕар субсидия анаан тэрилтэ салайааччыта үлэтиттэн уурайда

Ленскэй оройуон борокуратуурата коррупцияны утары сокуону тутуһууну бэрэбиэркэлээтэ. Бу туһунан СӨ Борокуратууратын пресс-сулууспата суруйар.

Бэрэбиэркэ кэмигэр Ленскайдааҕы тыа хаһаайыстыбатын управлениетын салайааччыта сокуон ирдэбилин утаран, тыа хаһаайыстыбатын салаатынан субсидия аныырга бэйэтин интэриэстээҕин биллэрбэтэх. Ол курдук, судаарыстыба өйөбүлүн бааһынай (пиэрмэр) хаһаайыстыба салайааччытыгар — чугас аймаҕар аныырга дьаһал таһаарбыт.

Борокуратуура казеннай тэрилтэ салайааччытын ууратарга суукка үҥсүү түһэрбит. Суут борокуруор ирдэбилин толору ылынна. Суут быһаарыыта сокуоннай күүһүгэр киирэ илик.