Чугас “Вонсан-Кальма” курорт аһылынна

Соҕуруу диэки күүлэйдиир кутталланан, барар-кэлэр эрэйдээх да соҕус буолан эрэринэн, биһиги Арассыыйа илин уһугар олорооччуларга, хата чугас курорт аһылынна.

Илиҥҥи муора кытылыгар КНДР “Вонсан-Кальма” диэн саҥа туристическай зонаны арыйда. Бу туһунан Корея Киин телеграфнай ааҕыныстыбата иһитиннэрэр.

Үөрүүлээх аһыллыы бэс ыйын 24 күнүгэр Ким Чен Ын кыттыылаах буолбут. Кэриэйэ лиидэрэ, манна аан дойду туристическай култуурунай сынньалаҥ киинэ буоларыгар эрэлин биллэрбитэ.

“Вонсан-Кальма” курортугар 20 тыһыынчаҕа диэри сынньанааччы киириэҕэ. Кини сиригэр-уотугар отеллар, пансионаттар, пляжтар, уу паарката, спортивнай уонна сынньалаҥ сирдэрэ, маҕаһыыннар уонна эрэстэрээннэр бааллар.

Хотугу Корея олохтоохторугар туристическай зона от ыйын 1 күнүгэр аһылынна, оттон Арассыыйа олохтоохторугар от ыйын 7 күнүттэн. Пляжка аҕыс күннээх туурдар от ыйыгар уонна атырдьах ыйыгар ыытыллыахтара, сыаната биир киһиэхэ 1,8 тыһыынча дуоллар кэриҥэ буолуоҕа.

Бу иннинэ, Британия блогера Хотугу Кореяҕа марафоҥҥа турист быһыытынан тиийэн, дойду туһунан санаатын суруйарыгар, «итиччэ көҥүлү күүппэтэҕим» диэн соһуйбут. Ол курдук видеотыгар элбэҕи уһуларын көҥүллээбиттэр.

Хэйхэҕэ – 2,5 мүнүүтэнэн

2026 сыл сааһыттан Арассыыйа дьоно Кытайга ханаат суолунан тиийэр кыахтаныахтара. Айан уһуна 2,5 мүнүүтэлээх буолуоҕа, Благовещенскайтан Хэйхэҕа диэри Амур өрүс үрдүнэн туоруохтара. Бу суолунан күҥҥэ 7 тыһыынча, сылга 2,45 мөл. кэриҥэ пассажир төттөрү-таары айанныа диэн сабаҕалыыллар.

Икки дойду кыраныыссатын туоруурга терминаллаах ыстаансыйалар тутуллуохтара. Таможеннай, пограничнай хонтуруолу син биир ааһаҕын.