Чугастааҕы биэс сылга оробуочай идэҕэ наадыйыы элбиэҕэ

Быйылгыттан ыла «Каадырдар» саҥа национальнай бырайыак саҕаланна. Үлэ биир дьоһун суолталаах хайысхатынан оробуочай каадырдары бэлэмнээһин буолар.

Каадырга наадыйыыны сабаҕалааһынтан көрдөххө, идэлээх оробуочайдар -– ордук наадалаах исписэлиистэр. Чугастааҕы 5 сылга дойдуга оробуочай исписэлиистэр, ол иһигэр мэхээньиктэр, силиэсэрдэр -– механическай массыыналары хомуйааччылар, станочниктар уонна станоктары таҥааччылар, электриктэр, сварщиктар уонна иистэнньэҥнэр, асчыттар, силиэсэр-сантехниктар, турбаны тардааччылар, кыраан оператордара, фрезеровщиктар, токардар наада буолуохтара.
«Оробуочай идэ -– ыарахан усулуобуйалаах уонна кыра хамнастаах» диэн өйдөбүл баар. Ол гынан баран, билигин ити өйдөбүл сыыһалардаах. Үлэ усулуобуйата тупсар, эргэ тэриллэри үрдүк технологиялаах, аныгы табыгастаах тэриллэр солбуйаллар, хамнас үрдүүр. Холобур, сварщик уонна газорезчик -– ыйга 150-200, электрик, силиэсэр, сантехник – 200, токарь уонна фрезеровщик 300 тыһыынча солкуобай суумалаах хамнаска суоттаныахтарын сөп. Ордук наадалаах идэни буларга «Арассыыйа үлэтэ» каадыр кииннэрэ көмөлөһөллөр. Билигин дойду эрэгийиэннэригэр 900-тэн тахса Каадыр кииннэрэ бааллар, 2028 сыл бүтүөр диэри «Каадырдар» национальнай бырайыак көмөтүнэн өссө 1,5 тыһыынчанан элбиэҕэ.
Билигин «Арассыыйа үлэтэ» www.trudvsem.ru  бакаансыйа базатыгар 1,6 мөлүйүөнтэн тахса этии киирэр, онтон үс гыммыт биирэ – оробуочай идэлэр. Ону сэргэ Каадыр киинин өйөбүлүнэн судаарыстыба суотугар идэҕэ үөрэниэххэ сөп. Үөрэх бырагырааматын хайысхаларын   «Арассыыйа үлэтэ» порталга билсиэххэ уонна сайаапканы биэриэххэ сөп.
«Каадырдар» национальнай бырайыак каадырдары хаачыстабалаахтык уонна түргэнник бэлэмнииргэ көмөлөһөр.