Чугастааҕы сорук – навигация сезона бүтүөр диэри хаалыыны суох оҥоруу

Бүгүн навигация кэмигэр таһаҕаһы таһыыны сүрүнннүүр суһал бөлөх мунньаҕа буолан ааста. Мунньахха өрөспүүбүлүкэни олоххо наадалаах ресурсаларынан хааччыйыыга эппиэтинэстээх тэрилтэлэр уонна биэдэмэстибэлэр  бэрэстэбиитэллэрэ кыттыннылар диэн СӨ Гражданскай оборуона дьыалаларыгар уонна олох-дьаһах куттала суох буолуутун хааччыйыыга министиэристибэтэ иһитиннэрэр. 

2025 сыл атырдьах ыйын 19 күнүнээҕи туругунан, таһаҕаһы таһыы 767 903,3 туоннаҕа (былаан – 66,8%) тиийбит, ол ааспыт сылтан 9,6% кыра. 609 579,6 туонна (былаан – 53,1%) тиэрдиллибит. Саамай улахан хаалыы – чоххо (–15,5%), ньиэпкэ (–5,4%), ньиэп бородуукталарыгар (–6,2%) уонна аһылык табаардарыгар (–6,2%) бэлиэтэнэр.

1. Гидрологическай уонна судоходнай балаһыанньа.

Күнү-дьылы кэтээн көрөр сулууспа өрүстэргэ уу таһыма үрдүгүнэн, Белай Гора пуордугар суудуналар сырыылара уустугурда диэн иһитиннэрдэ. «Администрация Ленского бассейна» тэрилтэ уунан таһаҕаһы таһыы тохтооюотун курдук кэтээн көрүү үлэлэрин ыытар.

Дьааҥы, Индигиир уонна Халыма өрүстэригэр 5 земснаряд үлэлиир, ол эрээри кинилэр үлэлэрин көдьүүһэ күн-дьыл усулуобуйатыттан намтыыр.

2. Уматыгы уонна чоҕу тиэрдии

ОДьКХ Кыһыл-Сыыртан Сангаарга гаас конденсатын уматыга (11831,2 туонна) толору тиэрдиллибитин туһунан даакылааттаата. Булуҥ уонна Анаабыр улуустарыгар тиэрдии болдьоҕо логистическай хааччахтары учуоттаан чопчуланыахтаах.

Орто Халымаҕа чоҕу тиэйии былаантан хаалан иһэр (38,5% туолбут). «КСК» АУо уонна «ОДьХ» ГУП суудуналар ахсааннарын элбэтэргэ үлэлиир.

3. Тиэхиньикэни өрөмүөннээһин уонна чоҕу хостооһун

«Якутуголь» АУо тиэхиньикэлэрин (буурдуур станоктар, экскаватордар) өрөмүөннээбитин туһунан иһитиннэрдэ, ол чоҕу хостооһун тэтимин түргэтэтиэ. Ыскылааттарга 13,74 тыһыынча туонна эрэ чох хаалбыт, онон тэриллэрин түргэнник чөлүгэр түһэриэхтэрин наада.

4. Үбүлээһин уонна логистика

«АТЛК» АК уонна Арктика министиэристибэтэ социальнай суолталаах ас-үөл табаарын кэҥэтиллибит ассортимена тиэйиитин үбүлээһин боппуруостарын дьүүллэһэллэр. Табаарынан хааччыйааччылары, ол иһигэр «Иркутская нефтяная компания».  ХЭУО-ну кытта кэпсэтиини күүһүрдэргэ быһаардылар.

Төһө даҕаны ыарахаттар үөскээтэллэр – уустук гидрологическай быһыы-майгы, тиэхиньикэни өрөмүөннээһин бытаарбытын уонна логистическай кыһалҕалар баалларын иһин, мунньах кыттыылаахтара бары ыксаллаах быһыыга-майгыга бэлэмнэрин көрдөрөллөр. Онон ураты болҕомто чоҕу уонна ньиэп бородуукталарын тиэйиини түргэтэтиигэ, метеосулууспаны кытта үлэни сүрүннээһиҥҥэ, эбии ресурсалары тардыыга федеральнай структуралары кытта бииргэ үлэлээһиҥҥэ улахан болҕомтону уурарга быһаардылар.