«Чульман» аэропорда 90% бэлэм

Нерюнгри оройуонугар биир кыһалҕалаах боппуруоһунан «Чульман» аэропорда буолар. Аэропорду саҥардыы үлэтэ үбүлээһин тиийбэтэҕиттэн атахтанан, ыйыллыбыт болдьохтон хаалан иһэр.

Ол туһунан бүгүн Ил Дархан Айсен Николаев “Саха” НКИХ Нерюнгритааҕы филиалыгар быһа эпииргэ ыйытыы киирбитигэр кэпсээтэ.

«Бүгүн генбэдэрээтчит Василий Суховерховы кытары үлэ хаамыытын туһунан кэпсэттим. Бу эбийиэк федеральнай бырагырааманан тутуллар эрээри, Саха сирин сиригэр-уотугар ыытылларынан, хонтуруоллуур кэриҥнээхпит. Үлэ атахтаммыта икки өрүттээх: бастакытынан, генбэдэрээтчит хантарааҕын болдьоҕо бүппүт, иккиһинэн, 2017 сыллаахха оҥоһуллубут бырайыак-симиэтэтэ саҥа ирдэбиллэргэ эппиэттээбэт буолбут. Балачча кэм ааспытынан, миллиард солкуобай кэриҥэ үп тиийбэт кыһалҕатыгар киирбит. Биһиги өттүбүтүттэн Уһук Илин боломуочуйалаах бэрэстэбиитэлэ Юрий Трутнев таһымыгар туруорсубуппут», — диэн Айсен Николаев эттэ.

Онон бырайыактыыр-симиэтэлиир докумуон уонна үбүлээһин саҥаттан көрүллэн, эбийиэк быйыл күһүн тутуута түмүктэнэрэ былааннанар.

«Нерюнгри оройуонун олохтоохторун сүрүн кыһалҕатынан буолбут эбийиэк аны күһүҥҥэ диэри үлэҕэ киирэригэр бары кыаҕы ууруохха наада», — диэн бэлиэтээтэ Ил Дархан.

Кини эппитинэн, сөптөөх былааннаах үлэ баран, бэдэрээтчит кылгас кэмҥэ көтөр-түһэр балаһаны оҥорбут. Бу эбийиэк магистральнай уонна дириҥэтэн киллэрии бырагырааматынан олоххо киирэн эрэрин Айсен Николаев бэлиэтээн эттэ.