Чульмаҥҥа 18 саастаах уол дьиэлэр ититиилэрин ситимнэрин араарбыт

Нерюнгри улууһун Чульман бөһүөлэгэр 18 саастаах уол таһырдьа -40 кыраадыс буолан турдаҕына, дьиэлэр ититиилэрин ситимнэрин соруйан араартаабыт, ол иһигэр социальнай эбийиэктэри эмиэ.  Бу туһунан СӨ ИДьМ пресс-сулууспата иһитиннэрэр.

Полиция дааннайдарынан, олохтоох киһи күлүгээнниир санааттан маннык гыммыт. Сэтинньи 24 күнүттэн ахсынньы 21 күнүгэр диэри хараҥаҕа тахсан ититии ситимин арматуратын уонтан тахсата төхтүрүйэн хатаабыт.

«Энергорайон Чульман» хомунаалынай тэрилтэ исписэлиистэрэ кэмигэр бэлиэтии көрөннөр, ыксаллаах быһыы-майгы тахсыбатах.