Чульмаҥҥа суол хаара ыраастамматаҕынан административнай дьыала көбүтүллүөҕэ

Нерюнгритааҕы борокуратуурата Чульман бөһүөлэккэ кыһыҥҥы кэмҥэ айан суоллар көрүүтэ адьас мөлтөҕүн туһунан куйаар ситимигэр киэҥник тарҕаммыт иһитиннэриини бэрэбиэркэлээтэ.

Бэрэбиэркэ түмүгүнэн, Чульмаҥҥа О.Кошевой, Свердлов, Транспортнай уулуссаларын ыраастааһыҥҥа сокуон ирдэбиллэрин кэһиллиитэ тахсыбыт чахчыта быһаарылынна. Ол курдук, суоллар икки кытыытынан хаар хомуллан тиэйиллибэт, устатын тухары анньыллыбат, көннөрүллүбэт эбит. Икки өттүттэн хаар өрөһөлүү мунньуллан суол кэтитэ 110-тан 150 см тиийэ кыараабыт, тротуар ыраастаммакка 10 см халыҥнаах хаарынан бүрүллүбүт.

Борокуратуура Чульман бөһүөлэгин баһылыгын э.т. дуоһунастаах аатыгар сокуону кэһиигэ административнай дьыаланы көбүтэргэ бэрэбиэркэ ыытарын саҕалаата. Бу туһунан СӨ Борокуратууратын пресс-сулууспата суруйар.