Чулуу кикбоксер Иннокентий Макаров кэриэһигэр кикбоксиҥҥа күрэхтэһии буолла

Саха чулуу уола, албан ааттаах кикбоксер, уопсастыбаннай диэйэтэл, меценат, СӨ кикбоксиҥҥа  Федерациятын вице-бэрэсидьиэнэ, «Сатал» СОНТ бастакы бэрэссэдээтэлэ Иннокентий Васильевич Макаров сырдык кэриэһигэр, бу күннэргэ  Уһук Илиҥҥи  уокурукка кикбоксиҥҥа  күрэхтэһии сүүмэрдиир түһүмэҕэ үрдүк таһымнаахтык буолан ааста.

Иннокентий Макаров 1975 сыллаахха олунньу 1 күнүгэр ыал бастакы, күүтүүлээх оҕонон күн сирин көрбүтэ. Оскуолаҕа үөрэнэр сылларыгар тустуунан утумнаахтык дьарыктанан саҕалаабыта. СГУ физкультурнай салаатыгар туттарсан үөрэххэ киирбитэ. Ити кэмтэн успуорт саҥа көрүҥнэринэн дьарыктаммыта.  Салгыы кикбоксанан утумнаахтык дьарыктанан араас таһымнаах улахан күрэхтэһиилэргэ кыттан ситиһиилэнэн барбыта.

1995 сыллаахха Киев куоракка ыытыллыбыт Аан дойду чемпионатыгар бэйэтин ыйааһыныгар чөмпүйүөн үрдүк аатын ылбыта. Ити сыл Канада Оттава куоратыгар ыытыллыбыт Аан дойдуга бастыыр иһин күрэхтэһиигэ эмиэ кыайыылааҕынан тахсыбыта. 1997 сыллаахха  Англия Бирмингем куоратыгар ыытыллыбыт чемпионатка эмиэ кыайыылааҕынан тахсыбыта. Онон, кылгас кэм иһигэр кикбоксиҥҥа  үс төгүллээх чөмпүйүөн үрдүк аатын сүкпүтэ.

Иннокентий ийэтэ Тамара Макарова: «Биһиги оҕобут төрөөбүт күнүн көрсө номнуо хаһыс да сылын күрэхтэһии ыытыллар. Былырыын уолбут төрөөбүтэ  50 сылыгар  анаан  ыытыллыбыта. Баара буоллар билигин 51 саастаах  буолуо эбит. Күрэхтэһии тэрийээччилэригэр улахан сиэним Эрхан Макаров баар. Ол курдук,  икки күн устата Уһук Илин эрэгийиэннэрин ортотугар Дьокуускайга кикбоксиҥҥа  сүүмэрдиир түһүмэҕэ оҕолорго буолан ааста. Бу түһүмэххэ өрөспүүбүлүкэбит араас улуустарыттан уонна Дьокуускай куораттан оҕолор кытыннылар. Турнир икки көрүҥүнэн ыытылынна. Уопсайа 200-тэн тахса оҕо кытынна. Күрэхтэһии 2019 сылтан  «Триумф» успуорт уораҕайыгар бокса саалатыгар ыытыллар. Бары тэрийээччилэргэ, успуонсардарга, кыттааччыларга дьиэ кэргэммит аатыттан махталбын тиэрдэбин. Чаҕылхай уонна кылгас олоҕу олорон ааспыт оҕобут аатын бу көрүҥҥэ утумнаахтык дьарыктанар сахабыт уолаттара ааттатыахтара, салгыахтара диэн эрэнэбин. Оҕолорго ситиһии кэлэ турдун. Успуорт диэн күүстээх дьаныары, дьулууру уонна бэйэҕэ ирдэбили ирдиир. Маннык күрэхтэһии сыл ахсын ыытылла турарыгар СӨ  кикбоксиҥҥа  Федерациятын бэрэсидьиэнигэр Колодезников Алексей Зосимовичка,  солбуйааччы дириэктэригэр, Хатас орто оскуолатын дириэктэрэ, оҕобутун кытта бииргэ үөрэммит доҕоро Слепцов Николай Владимировичка уонна СГУ-га бииргэ үөрэммит, күрэхтэспит доҕотторугар Иван Марковка, Уйусхан Барашковка, Андрей Алексеевка, Захар Румянцевка, Сергей Мироновка, Василий Васильевичка, Томпо улууһун Мэҥэ Алдан нэһилиэгин олохтооҕо, уолбут бастакы тириэньэригэр Андросов Прокопий Прокопьевичка, оскуолаҕа бииргэ үөрэммит оҕолоругар Захаров Александрга, Данилов Михаилга  махталбытын  тиэрдэбит«, — диэн санаатын үллэһиннэ.