Чулуу салайааччы Гавриил Чиряев

Саха тарбахха баттанар биир улахан салайааччыта, бөдөҥ судаарыстыбаннай уонна бэлитиичэскэй диэйэтэлэ, 1965-1982 сс. Сэбиэскэй Сойуус коммунистическай баартыйатын Саха уобаластааҕы кэмитиэтин бастакы сэкирэтээрэ Г.И. Чиряев бүгүн төрөөбүтэ 100 сыла туолла.

Суорун Омоллоон аатынан Опера, балет судаарыстыбаннай тыйаатырыгар ытык киһибит төрөөбүтэ 100 сылын  бэлиэтиир уопсастыбаннас өрөгөйдөөх мунньаҕа саҕаланна.

СӨ бырабыыталыстыбатын бэрэссэдээтэлэ Кирилл Быков, Гавриил Чиряев Саха сирин 17 сыл устата салайарыгар өрөспүүбүлүкэ бары хайысханан сайдыытыгар улахан акылааты оҥорбутун бэлиэтээтэ.
«Бүгүн Саха сирин чулуу уолун, төрөөбүт өрөспүүбүлүкэтин сайдыытын туһугар сүҥкэн кылааты киллэрбит киһини чиэстиибит. Норуот хаһаайыстыбатын бары салаатыгар новаторскай, революционнай да диэххэ сөп хорсун быһаарыылары ылыммыт, олоххо киллэрбит салайааччынан буолар. Ол курдук
Саха сирин соҕуруу өттүгэр сүҥкэн оҥорон таһаарар база үөскээбитэ. Нерюнгри куорат тутуллубута, Беркакикка диэри тимир суол кэлбитэ, Дьокуускайдааҕы, Нерюнгритааҕы уонна Бүлүүтээҕи ГРЭС-тэр тутуллубуттара, алмааһы хостуур бөдөҥ кэмбинээт үлэҕэ киирбитэ, ньиэп уонна гаас хостооһунун төрүттэрэ ууруллубуттара. Бу Гавриил Иосифович кэмигэр үлэҕэ киирбит тэрилтэлэр Саха сирин олохтоохторугар өссө да өр кэмнэргэ туһалыы туруохтара. Биһиги кини аатын куруук махталынан ахтыахпыт».

Афанасий Владимиров, Ил Түмэн бэрэссэдээтэлин солбуйааччы:
-Гавриил Чиряев Саха норуотун чулуу салайааччыта, устуоруйаҕа бэйэтин аатын хаалларбыт киһи буолар. Кини хайдах курдук хорсун санаалаах, дойдутугар бэриниилээх, таптыыр этэй. Биһиги бу күн төттөрү эргиллэн көрдөхпүтүнэ, кини оччолорго ыыппыт үлэтин күн бүгүҥҥэ диэри туһана сылдьабыт. Саха норуотун култууратын, духуобунаһын, интеллигенциятын өрө тутан, научнай институттары, бырамыысыланнаһы тэрийэн, Сэбиэскэй Сойууска улахан өрөспүүбүлүкэ буолан тахсыбыппыт. Биһиги бүгүн кинини ахтабыт-саныыбыт, киниттэн холобур ылабыт, — диэтэ.
Ил Дархан Айсен Николаев Гавриил Чиряев аатын үйэтитэр туһунан дьаһалга илии баттаата, кини холобура норуокка хайдах сулууспалыырга ыйыы буоларын курдук. Нерюнгри оройуонун баһылыга Роман Щегельняк Нерюнгрига тутуллубут саҥа аэропорт Гавриил Чиряев аатын сүгэр буолбутун дохсун ытыс тыаһын ортотугар иһитиннэрдэ.
Улуу киһи оҥорон, тутан хаалларбыта бириэмэ ааһан истэҕин аайы өссө улаатан, баараҕадыйан иһэр айылгылаах.
Саха чулуу уола Гавриил Чиряев олоҕун суола, норуотугар анаабыт сүдү үлэтэ ону толору кэрэһилиир.