«Чума» киинэ 3,2 мөлүйүөн солкуобайы хомуйда

Дмитрий Давыдов «Чума» киинэтэ ааспыт нэдиэлэҕэ 3,2 мөлүйүөн солкуобайы хомуйда. Бастакы көрдөрбүт күннэригэр — балаҕан ыйын 19 күнүгэр 877 тыһыынча солкуобайы «өлөрбүтэ».

Режиссер Дмитрий Давыдов элбэх наҕарааданы ылбыт «Пугало» киинэтэ урут бастакы нэдиэлэ түмүгүнэн 5 мөлүйүөн солкуобайы хомуйан турар.

Оттон «Чума» киинэ Италияҕа Lucania Film Festival киинэ бэстибээлигэр International Fiction Film номинацияҕа сүрүн бирииһи ылан турар. Маны тэҥэ, Германия Висбаден куоратыгар буолбут  goEast! киинэ бэстибээлигэр ФИПРЕССИ наҕараадатын ылбыта.

Саха сиригэр саамай элбэх үбү-харчыны хомуйбут киинэнэн Марианна Сиэгэн «Карината» буолар. Аҕыйах нэдиэлэ иһигэр 12,4 мөлүйүөн солкуобайы «өлөрбүтэ». Онтон Михаил Лукачевскай «Кыталыктаах кырдалым» киинэтэ 12,2 мөлүйүөн солкуобайы хомуйан, рекордка кыранан тиийбэтэҕэ.