Чунуобунньук сэттэ сылга көҥүлэ быһылынна

Дьокуускай куораттааҕы суут Үөһээ Бүлүү улууһун тыа хаһаайыстыбатын управлениетын урукку начаалынньыгын сэттэ сылга уопсай эрэсиимнээх холуонньаҕа көҥүлүн быһар туһунан бириигэбэри таһаарда. Бу туһунан СӨ Борокуратуурата иһитиннэрэр.

Экс-чунуобунньугу кытта бу дьыалаҕа сыһыаннаах өссө икки киһи сууттанна. Биир дьахтар түөрт сылга уопсай эрэсиимнээх холуонньаҕа, оттон үһүс киһи үс сыл холоон көрөр болдьохтоох усулуобунайдык биэс сылга көҥүллэрэ быһылынна.

«Дьокуускайга Үөһээ Бүлүү улууһун тыа хаһаайыстыбатын управлениетын урукку начаалынньыга сууттанна. Сууттанааччы сулууспатын туһанан, тэриллиилээх бөлөҕү тэрийэн, оройуон тыатын хаһаайыстыбатын сайыннарыыга ыытыллыахтаах өрөспүүбүлүкэ бүддьүөтүттэн көрүллүбүт харчыны уорбут», — диэн иһитиннэриигэ суруллар.

Сууттанааччылар бэйэ-бэйэлэрин кытта кэпсэтэн баран, 6 мөл.солк. тахса субсидияҕа анаммыт харчыны уорбуттар. Бу харчы хотон тутарга тыырыллыбыт, билигин да тутулла илик.

Маны таһынан управление начаалынньыга кыттыгастаах дьахтары кытта юридическай тэрилтэни тэрийбиттэр, манна тэрийээччилэринэн сымыйанан булуллубут дьону туруорбуттар. Бу хампаанньа нөҥүө  пиэрмэрскэй хаһаайыстыбаларга бородуукусуйалары уонна тиэхиньикэлэри атыылаһыыга сымыйа дуогабардары оҥорбуттар. Онтон салгыы бу докумуоннарга тирэҕирэн пиэрмэрдэр толуйууну ылбыттар. Ол түмүгэр оройуон бүддьүөтүгэр 3 мөл.солк. тахса хоромньу оҥоһуллубут.